വണ്ടൂര്‍:കാളികാവ് എക്‌സൈസ് റേഞ്ച് ഓഫിസ് പ്രവര്‍ത്തിക്കുന്ന വണ്ടൂര്‍ കരുണാലയപ്പാടിയിലെ വാടക കെട്ടിടത്തിന്റെ മേല്‍ക്കൂരയുടെ ഒരു ഭാഗം തകര്‍ന്നു വീണു .കഴിഞ്ഞ ദിവസം രാത്രിയാണ് മേല്‍ക്കൂര തകര്‍ന്നു വീണത് .തൊണ്ടിമുതല്‍ സൂക്ഷിക്കുകയും ജീവനക്കാര്‍ വിശ്രമിക്കുകയും ചെയ്യുന്ന മുറിയിലേക്കാണ് തകര്‍ന്ന കഴുക്കോലുകളും ഓടുകളും പതിച്ചത് .പാറാവ് ഡ്യൂട്ടിയിലുണ്ടായിരുന്ന ജീവനക്കാരന്‍ തലനാരിഴക്കാണ് രക്ഷപെട്ടത്. കരുണാലയപ്പടിയിലെ വര്‍ഷങ്ങള്‍ പഴക്കമുള്ള വാടക കെട്ടിടത്തിലാണ് ഓഫിസ് പ്രവര്‍ത്തിക്കുന്നത്. സമീപത്തുള്ള കെട്ടിടങ്ങള്‍ പ്രളയസമയത്ത് അപകടാവസ്ഥയിലായിരുന്നതിനാല്‍ പൊളിച്ച് നീക്കിയിരുന്നു. കെട്ടിടം നിര്‍മിക്കുന്നതുമായി ബന്ധപ്പെട്ട് സ്ഥലം അളന്ന് തിട്ടപ്പെടുത്തിയിട്ടുണ്ടെങ്കിലും തുടര്‍ നടപടികള്‍ എങ്ങുമെത്തിയിട്ടില്ല.സമീപത്തുള്ള ഗവ:ഹോമിയോ കാന്‍സര്‍ ആശുപത്രിയോട് ചേര്‍ന്നുള്ള 25 സെന്റ് സ്ഥലം അളന്ന് തിട്ടപ്പെടുത്തിയിരുന്നു.കെട്ടിടം നിര്‍മിക്കാനായി 25 ലക്ഷം രൂപ അനുവദിക്കാമെന്ന് സ്ഥലം എം.എല്‍.എ അനില്‍കുമാര്‍ പറഞ്ഞിട്ടുണ്ട്.