പള്ളിക്കല്‍: പള്ളിയില്‍  കാന്തപുരം വിഭാഗം  സംഘര്‍ഷമുണ്ടാക്കിയതിനെ തുടര്‍ന്നു പള്ളിക്കല്‍ബസാര്‍ പള്ളിയില്‍ പെരുന്നാള്‍ നിസ്‌കാരം നടത്തിയതു വന്‍ പൊലിസ് കാവലില്‍. കാന്തപുരം വിഭാഗം പെരുന്നാള്‍ രാവില്‍ അസര്‍ നിസ്‌കാരം തടസപ്പെടുത്തി വൈകിട്ടോടെതന്നെ സംഘര്‍ഷമുണ്ടാക്കാന്‍ ശ്രമം നടത്തിയിരുന്നു. തുടര്‍ന്നു രാത്രിയില്‍ ഇശാഅ് നിസ്‌കാരവും തടസപ്പെടുത്താന്‍ ശ്രമിച്ചതോടെ പ്രശ്‌നം സംഘര്‍ഷത്തില്‍ കലാശിക്കുകയായിരുന്നു.
സംഘര്‍ഷത്തില്‍ പള്ളിയില്‍ പ്രാര്‍ഥനയ്‌ക്കെത്തിയവര്‍ക്കും അക്രമികള്‍ക്കും പരുക്കേറ്റു. പെരുന്നാള്‍ ദിനത്തില്‍ പള്ളിയിലെ ഔദ്യോഗിക പെരുന്നാള്‍ നിസ്‌കാരത്തിന് പുറമേ കാന്തപുരം വിഭാഗവും ജമാഅത്തായി നിസ്‌കരിക്കാനുള്ള നീക്കമുണ്ടായിരുന്നു. തലേന്നു രാത്രി ഇശാഅ് നിസ്‌കാരം ഔദ്യോഗിക ജമാഅത്ത് നടക്കുന്ന സമയത്തുതന്നെ നടത്തുകയും ചെയ്തു. തുടര്‍ന്നു സംഘര്‍ഷമുണ്ടായതിനെ തുടര്‍ന്നു വന്‍ പൊലിസ് സംഘം രാത്രി തന്നെ എത്തിയിരുന്നു.
പെരുന്നാള്‍ ദിനത്തില്‍ അതിരാവിലെതന്നെ മലപ്പുറം ഡിവൈ.എസ്.പി ജലീല്‍ തോട്ടത്തില്‍, തിരൂരങ്ങാടി സി.ഐ ബാബുരാജ് എന്നിവരുടെ നേതൃത്വത്തില്‍ കൊണ്ടോട്ടി, തിരൂരങ്ങാടി സര്‍ക്കിളില്‍പെട്ട വാഴക്കാട്, കൊണ്ടോട്ടി, കരിപ്പൂര്‍, വേങ്ങര, തിരൂരങ്ങാടി, തേഞ്ഞിപ്പലം സ്റ്റേഷനുകളിലെ എസ്.ഐമാരുടെ നേതൃത്വത്തിലുള്ള പൊലിസ് സംഘവും സ്‌ട്രൈക്കര്‍ പൊലിസിന്റ ഒരു ബറ്റാലിയനും എം.എസ്.പിയുടെ ഒരു ബറ്റാലിയനുമാണ് പെരുന്നാള്‍ നിസ്‌കാരത്തിനു സംരക്ഷണം നല്‍കിയത്. വ്യാജ രേഖയുണ്ടാക്കി പള്ളി പിടിച്ചെടുക്കാനുള്ള കാന്തപുരം വിഭാഗത്തിന്റെ ശ്രമത്തിന്റെ ഭാഗമായി നടന്ന സംഘര്‍ഷത്തെ തുടര്‍ന്ന് അടച്ചുപൂട്ടിയ പള്ളി വഖ്ഫ് ബോര്‍ഡിന്റെ നിയന്ത്രണത്തില്‍ നടത്തിയ തെരഞ്ഞെടുപ്പിലൂടെ ഭരണംലഭിച്ചു സമസ്ത വിഭാഗം പരിപാലനം നടത്തിവരികയാണ്.