കോഴിക്കോട്: അത്തോളി പഞ്ചായത്തിലെ കൊടശ്ശേരി പെരളിമലയില്‍ താമസിക്കുന്നവരുടെ നികുതി സ്വീകരിക്കാന്‍ അധികൃതര്‍ തയാറാകാത്തതില്‍ പ്രതിഷേധിച്ച് വിവിധ സംഘടനകളുടെ നേതൃത്വത്തില്‍ വില്ലേജ് ഓഫിസ് ഉപരോധിച്ചു. ഇന്നലെ രാവിലെ പ്രകടനവുമായെത്തിയ പ്രദേശവാസികളാണ് വില്ലേജ് ഓഫിസ് ഉപരോധിച്ചത്.
ആധാരവും അടിയാധാരവുമുണ്ടായിട്ടും നികുതി സ്വീകരിക്കാത്തതിനാല്‍ ഇവിടെ 21 കുടുംബങ്ങളുടെ ജിവതമാണ് വഴിയാധാരമായത്.
എന്നാല്‍ ഭൂമി സ്വന്തമാണെന്നു ബോധ്യപ്പെട്ട് ഇവര്‍ക്ക് സര്‍ക്കാരില്‍നിന്ന് വീട് നിര്‍മിക്കാന്‍ ഫണ്ട് ലഭിച്ചിരുന്നുവെങ്കിലും നികുതി അടക്കാന്‍ സാധിക്കാത്തതിനാല്‍ പലരുടെയും വീടുപണിയും നിലച്ചിരിക്കുകയാണ്.
നിലവില്‍ വൈദ്യുതി ബില്ലടക്കം വ്യാപാര സ്ഥാപനങ്ങളുടെ നിരക്കിലാണ് ഇവര്‍ അടക്കുന്നത്. 2013-14 വര്‍ഷങ്ങളില്‍ ഇവരുടെ പേരിലുള്ള നികുതി അത്തോളി വില്ലേജ് ഓഫിസില്‍ സ്വീകരിച്ചിരുന്നു. പിന്നീട് കഴിഞ്ഞ മൂന്നു വര്‍ഷമായി ഇവരുടെ നികുതി സ്വീകരിക്കാന്‍ റവന്യൂ അധികൃതര്‍ തയാറായിരുന്നില്ല.
എന്നാല്‍ ജൂലൈ മൂന്നിനകം ഇതുമായി ബന്ധപ്പെട്ട സര്‍വേ നടത്തി നികുതി സ്വീകരിക്കാനുള്ള നടപടി സ്വീകരിക്കുമെന്ന് കൊയിലാണ്ടി തഹസില്‍ദാര്‍ എന്‍. റംല പ്രതിഷേധക്കാര്‍ക്ക് ഉറപ്പു നല്‍കി.
ഹൈക്കോടതിയിലെ മിച്ചഭൂമി കേസ് നിലവിലുള്ള ഭൂമി ഒഴികെ മറ്റുള്ളവരുടെ രേഖകള്‍ പരിശോധിച്ച് രണ്ട് ദിവസത്തിന് ശേഷം നികുതി സ്വീകരിക്കുമെന്നും സര്‍വേ നടപടിക്ക് ശേഷം ശാശ്വത പരിഹാരം കാണുമെന്നും തഹസില്‍ദാര്‍ വാര്‍ത്താക്കുറിപ്പില്‍ അറിയിച്ചു.
ഇതിന്റെ അടിസ്ഥാനത്തില്‍ ഉച്ചയ്ക്ക് രണ്ട് മണിയോടെ പ്രതിഷേധക്കാര്‍ പിരിഞ്ഞു പോയി.