മുംബൈ: പ്രതിപക്ഷത്തിരിക്കുമെന്ന് എന്‍.സി.പി നേതാവ് ശരത് പവാര്‍ പ്രസ്താവിച്ചതിന് പിന്നാലെ മഹാരാഷ്ട്രയില്‍ വീണ്ടും ബി.ജെ.പി-ശിവസേന സഖ്യത്തിലുള്ള സര്‍ക്കാര്‍ തുടരുമെന്ന് വ്യക്തമാക്കി ബി.ജെ.പി നേതാവിന്റെ വാക്കുകള്‍. നിങ്ങള്‍ എത്രശ്രമിച്ചാലും ജനം വേര്‍തിരിക്കാനാവില്ലെന്നും ബി.ജെ.പിയും ശിവസേനയും അതുപോലെയാണെന്നുമാണ് സംസ്ഥാനത്തെ ബി.ജെ.പി നേതാവ് സുധിര്‍ മുന്‍ഗന്‍തിവാര്‍ പറഞ്ഞത്. ഞങ്ങള്‍ ആ വാര്‍ത്തക്ക് വേണ്ടി കാത്തിരിക്കുകയാണെന്നും ഏതുസമയത്തും ആ വാര്‍ത്ത പുറത്തുവരുമെന്നും അദ്ദേഹം കൂട്ടിച്ചേര്‍ത്തു. മുഖ്യമന്ത്രി ദേവേന്ദ്ര ഫട്‌നാവിസ് ഇന്ന് വിളിച്ചുചേര്‍ത്ത യോഗത്തില്‍ ആറ് ശിവസേനാ മന്ത്രിമാര്‍ പങ്കെടുത്തിരുന്നു. സംസ്ഥാനത്ത് പ്രളയത്തിന് ശേഷം കാര്‍ഷിക മേഖലയിലുണ്ടായ പ്രതിസന്ധിയെപ്പറ്റി ചര്‍ച്ച ചെയ്യാനാണ് യോഗമെന്ന് പറഞ്ഞിരുന്നുവെങ്കിലും സര്‍ക്കാര്‍ രൂപീകരിക്കാനാവശ്യമായ ഫോര്‍മുലകളും ചര്‍ച്ച ചെയ്തുവെന്നാണ് ലഭിക്കുന്ന സൂചന. ഈ യോഗത്തിന് ശേഷമാണ് ബി.ജെ.പി നേതാവിന്റെ പ്രസ്താവന വന്നത്. അതേസമയം മുഖ്യമന്ത്രി ദേവേന്ദ്ര ഫട്‌നാവിസ് സര്‍ക്കാര്‍ രൂപീകരണവുമായി ബന്ധപ്പെട്ട് നാളെ സംസ്ഥാന ഗവര്‍ണര്‍ ഭഗത് സിങ് കോശിയാരിയെ സന്ദര്‍ശിക്കുമെന്ന വിവരങ്ങളും പുറത്തുവരുന്നുണ്ട്.