തേഞ്ഞിപ്പലം: കാലിക്കറ്റ് സര്‍വകലാശാലാ ഇന്റര്‍സോണ്‍ ഫുട്‌ബോള്‍ ചാംപ്യന്‍ഷിപ്പില്‍ കൊണ്ടോട്ടി ഇ.എം.ഇ.എ കോളജ് ചാംപ്യന്‍മാരായി.
കൊണ്ടോട്ടി ഇ.എം.ഇ.എ കോളജ് ആദ്യമായാണ് ഇന്റസോണ്‍ ഫുട്‌ബോള്‍ കിരീടം നേടുന്നത്. കാലിക്കറ്റ് സര്‍വകലാശാലാ സ്റ്റേഡിയത്തില്‍ നടന്ന മത്സരത്തില്‍ കോഴിക്കോട് ദേവഗിരി കോളജുമായി നടന്ന ഫൈനലില്‍ എതിരില്ലാത്ത മൂന്ന് ഗോളിനാണ് ഇ.എം.ഇ.എ കോളജ് കിരീടം ചൂടിയത്.
ഇ.എം.ഇ.എക്ക് വേണ്ടി കളിയുടെ 65-ാം മിനുട്ടില്‍ എം.പി മുഹമ്മദ് അനസ് ആദ്യ ഗോള്‍ നേടി. 79- ാം മിനുട്ടില്‍ മുഹമ്മദ് അര്‍ഷദും 90-ാം മിനുട്ടില്‍ നിസാമുദ്ദീനും ഗോളുകള്‍ നേടി. സമാപന ചടങ്ങില്‍ കാലിക്കറ്റ് സര്‍വകലാശാലാ വൈസ് ചാന്‍സലര്‍ ഡോ. കെ. മുഹമ്മദ് ബഷീര്‍, മലപ്പുറം എസ്.പി യു. അബ്ദുല്‍ കരീം, പി.ആര്‍.എഫ് കമാണ്ടന്റ് യു. ഷറഫലി, രജിസ്റ്റാര്‍ ഡോ. സി.എല്‍ ജോഷി എന്നിവര്‍ സമ്മാനദാനം നിര്‍വഹിച്ചു.