കഠിനംകുളം: പ്ലസ് ടു പരീക്ഷയില്‍ മുഴുവന്‍ മാര്‍ക്ക് വാങ്ങി വിജയിച്ച വിദ്യാര്‍ഥിക്കു തുടര്‍ പഠനത്തിന് സഹായം വാഗ്ദാനം ചെയ്തും അനുമോദിച്ചും കഠിനംകുളം ജനമൈത്രി പൊലിസ്. തോന്നയ്ക്കല്‍ ഹയര്‍ സെക്കന്‍ഡറി സ്‌കൂളില്‍ നിന്നും കഴിഞ്ഞ പ്ലസ് റ്റു പരീക്ഷയില്‍ മുഴുന്‍ മാര്‍ക്ക് വാങ്ങി വിജയിച്ച പടിഞ്ഞാറ്റുമുക്ക് വെട്ടത്തു വീട്ടില്‍ വാടകക്ക് താമസിക്കുന്ന മുഹമ്മദ് സിദ്ധിഖിനെയാണ് കഠിനംകുളം ജനമൈത്രി പൊലിസ് അനുമോദിക്കുകയും തുടര്‍ പഠനത്തിന് സഹായം വാഗ്ദാനം ചെയ്യുകയും ചെയ്തത്.
പൊലിസ് സ്റ്റേഷനില്‍ സംഘടിപ്പിക്കാറുള്ള ഇഫ്താര്‍ വിരുന്ന് ലഘൂകരിച്ചു പൊലിസ് ഉദ്യോഗസ്ഥരില്‍ നിന്നും പിരിച്ചെടുത്ത പതിനായിരം രൂപ കടയ്ക്കാവൂര്‍ സി.ഐ മുകേഷ്  മുഹമ്മദ് സിദിഖിന് കൈമാറി കഠിനംകുളം എസ് ഐ ബിനീഷ്‌ലാല്‍ സന്നിഹിതനായിരുന്നു. വാപ്പ ഉപേക്ഷിച്ചു പോയതുമുതല്‍ ഉമ്മ ജോലിക്കു പോയി കിട്ടുന്ന തുച്ഛമായ വരുമാനം കൊണ്ടാണ് ഇപ്പോള്‍ പത്താംക്ലാസ് പാസായി പ്ലസ് വണ്‍ പഠനത്തിന് അപേക്ഷ നല്‍കിയിരിക്കുന്ന സഹോദരി സുമയ്യ ഉള്‍പ്പെടുന്ന കുടുംബം കഴിയുന്നത് .  ഉന്നത വിജയം കരസ്ഥമാക്കിയ മുഹമ്മദ് സിദ്ധിഖിന് തുടര്‍ സഹായവും തുടര്‍ പഠനത്തിനുള്ള സഹായവും പൊലിസ് വാഗ്ദാനം ചെയ്തിട്ടുണ്ട്.