തിരൂര്‍: പാനൂരില്‍നിന്ന് കഴിഞ്ഞ 19 മുതല്‍ കാണാതായ വിദ്യാര്‍ഥിനികള്‍ സയനയേയും ദൃശ്യയേയും തിരൂര്‍ റയില്‍വേ സ്റ്റേഷന്‍ പരിസരത്തെ 'തിരൂര്‍ ടൂറിസ്റ്റ് ഹോമി'ല്‍ കണ്ടെത്തി. ഇരുവരും കുട്ടിക്കാലം മുതല്‍ സഹപാഠികളും സുഹൃത്തുക്കളുമാണ്. ഇപ്പോള്‍ ലാബ് ടെക്‌നീഷ്യന്‍ വിദ്യാര്‍ഥികളായ ഇവരെ വീട്ടുകാര്‍ പഠനം അവസാനിപ്പിച്ച് വിവാഹത്തിന് നിര്‍ബന്ധിച്ചതോടെയാണ് നാടുവിട്ടതെന്ന് കുട്ടികള്‍ പൊലിസിനോട് പറഞ്ഞു. കണ്ണൂരില്‍നിന്ന് എറണാകുളത്തേക്ക് ട്രെയിനില്‍ ടിക്കറ്റെടുത്തെങ്കിലും വിശന്നപ്പോള്‍ തിരൂരില്‍ ഇറങ്ങി. തുടര്‍ന്ന് മലപ്പുറത്ത് പലസ്ഥലങ്ങളില്‍ മുറിയെടുത്തു. ഇന്നലെ വൈകിട്ടാണ് തിരൂര്‍ ടൂറിസ്റ്റ് ഹോമില്‍ മുറിയെടുത്തത്.
പരിസരത്തെ ഒരു ആശുപത്രിയില്‍ ജീവനക്കാരാണെന്നാണ് ഹോട്ടലില്‍ പറഞ്ഞത്. ഇതിനിടെ വിദ്യാര്‍ഥിനികളെ കാണാതായ വാര്‍ത്ത ഫേസ്ബുക്കില്‍ കണ്ട ഹോട്ടല്‍ ജീവനക്കാരന്‍ തിരിച്ചറിഞ്ഞ് പൊലിസില്‍ വിവരം അറിയിക്കുകയായിരുന്നു.