തിരുവനന്തപുരം: ജലസേചന വകുപ്പ് മന്ത്രി മാത്യു ടി.തോമസ് രാജിവച്ചു. ക്ലിഫ് ഹൗസിലെത്തിയ അദ്ദേഹം മുഖ്യമന്ത്രി പിണറായി വിജയന് നേരിട്ട് രാജിക്കത്ത് കൈമാറി. നാളെ വൈകിട്ടോടെ കെ. കൃഷ്ണന്‍കുട്ടിയോടെ സത്യപ്രതിജ്ഞ ഉണ്ടാകുമെന്നാണ് സൂചന.

ജനതാദള്‍ എസ് കേന്ദ്രനേതൃത്വ തീരുമാനപ്രകാരം കെ.കൃഷ്ണന്‍കുട്ടിയെ മന്ത്രിയാക്കണമെന്നാവശ്യപ്പെട്ട് ദേശീയ അധ്യക്ഷന്‍ ദേവഗൌഡ നല്‍കിയ കത്ത് മുഖ്യമന്ത്രി പിണറായി വിജയന് സി.കെ നാണു എം.എല്‍.എ കഴിഞ്ഞ ദിവസം കൈമാറിയിരിന്നു. തുടര്‍ നടപടികള്‍ ആലോചിച്ച് തീരുമാനിക്കുമെന്ന് മുഖ്യമന്ത്രി വ്യക്തമാക്കിയിരുന്നു. പുതിയമന്ത്രിയുടെ സത്യപ്രതിഞ്ജയുടെ കാര്യത്തിലും തീരുമാനമുണ്ടായേക്കും. നാളെ വൈകിട്ടോടെ രാജ് ഭവനില്‍ വച്ച് സത്യപ്രതിജ്ഞ നടത്തുന്നതിനെ കുറിച്ചാണ് സര്‍ക്കാര്‍ ആലോചിക്കുന്നത്.

രാവിലെ നിയമസഭ ചേരുമെങ്കിലും ചരമോപചാരം അര്‍പ്പിച്ച് പിരിയും. ഇത് കൂടി പരിഗണിച്ചാണ് വൈകിട്ട് സത്യപ്രതിജ്ഞ നടത്തുന്നതിനെ കുറിച്ച് ആലോചിക്കുന്നത്.അതേസമയം രാജിക്ക് പിന്നാലെ തന്നെ ജനതാദളിലെ പോര് മൂര്‍ച്ഛിക്കാനാണ് സാധ്യത. കൃഷ്ണന്‍കുട്ടി ഒഴിയുമ്പോള്‍ പുതിയ സംസ്ഥാന അധ്യക്ഷനായി മാത്യു ടി തോമസിനെ നിയമിക്കണമെന്നാവശ്യം ചില കോണുകളില്‍ നിന്ന് ഉയരുന്നുണ്ട്. എന്നാല്‍ കേന്ദ്രനേതൃത്വമായിരിക്കും ഇക്കാര്യത്തില്‍ അന്തിമ തീരുമാനമെടുക്കുന്നത്.