കണ്ണൂര്‍: ഫസല്‍ വധക്കേസില്‍ ആര്‍.എസ്.എസ് പ്രവര്‍ത്തകന്‍ സുബീഷിനെ ചോദ്യം ചെയ്ത പൊലിസ് ഉദ്യോഗസ്ഥനെ ഭീഷണിപ്പെടുത്തിയ കേസില്‍ ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന് ജാമ്യം. കണ്ണൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയാണ് ജാമ്യം അനുവദിച്ചത്. ഫെബ്രുവരി 14നു സുരേന്ദ്രന്‍ വീണ്ടും ഹാജരാകണം.

കേസുമായി ബന്ധപ്പെട്ട് പ്രൊഡക്ഷന്‍ വാറന്റ് പുറപ്പെടുവിച്ചതിനെ തുടര്‍ന്ന് ഇന്നലെ കൊട്ടാരക്കര സബ് ജയിലില്‍ നിന്ന് സുരേന്ദ്രനെ കണ്ണൂരിലെത്തിച്ചിരുന്നു. ഇന്നു തന്നെ തിരികെ കൊട്ടാരക്കരയിലേക്ക് കൊണ്ടുപോകും. ഞായറാഴ്ച കോഴിക്കോട് ജയിലിലായിരുന്നു അദ്ദേഹത്തെ പാര്‍പ്പിച്ചിരുന്നത്.

ഈ കേസില്‍ ജാമ്യം ലഭിച്ചെങ്കിലും സുരേന്ദ്രന് ജയില്‍ മോചിതനാകാന്‍ കഴിയില്ല. ശബരിമലയില്‍ സ്ത്രീയെ വധിക്കാന്‍ ഗൂഢാലോചന നടത്തിയെന്ന കേസില്‍ റാന്നി കോടതി ജാമ്യം നിഷേധിച്ചിരുന്നു. ജാമ്യം തേടി കെ. സുരേന്ദ്രന്‍ ഇന്ന് പത്തനംതിട്ട സെഷന്‍സ് കോടതിയെ സമീപിക്കും.