പൂച്ചാക്കല്‍: ചേര്‍ത്തല - അരൂക്കുറ്റി റൂട്ടില്‍ പാണാവള്ളി ഓടമ്പള്ളി വളവുമുതല്‍ വീരമംഗലം വരെയുള്ള റോഡില്‍ കുഴികളുടെ പരമ്പര. നന്നാക്കാന്‍ നടപടിയില്ല. രണ്ടു വളവിനും ഇടയിലെ ഒരുകിലോമീറ്ററോളം റോഡില്‍ ആറ് കുഴികളാണുള്ളത്. മഴയില്‍ വെള്ളക്കെട്ടും അപകടങ്ങളും പതിവ് കഴ്ചയാണ്. യാത്രക്കാര്‍ക്കും വാഹനങ്ങള്‍ക്കും പരുക്കേല്‍ക്കുന്നുണ്ട്. വീരമംഗലം ഭാഗത്തെ കുഴി നാട്ടുകാരും വ്യാപാരികളും ചേര്‍ന്ന് ഒരുതവണ നന്നാക്കിയെങ്കിലും വീണ്ടും കുഴിയായി.
പൊതുമരാമത്ത് വകുപ്പ് അധികൃതര്‍ ദിവസവും ഇതിലൂടെ കടന്നുപോകുന്നെങ്കിലും കുഴികള്‍ കണ്ടഭാവം പോലും കാണിക്കുന്നില്ലെന്നു നാട്ടുകാര്‍ പരാതിപ്പെടുന്നു. തൃച്ചാറ്റുകുളം, വടുതല കവലയുടെ വശങ്ങള്‍, പുത്തന്‍പാലം, പൂത്തൂര്‍പാലം തുടങ്ങിയ സ്ഥലങ്ങളിലും റോഡില്‍ കുഴികള്‍ വ്യാപകമാണ്.
പൂച്ചാക്കല്‍ ചന്തയ്ക്കു സമീപത്തെ റോഡിലെ വന്‍കുഴി പൊതുമരാമത്ത് വകുപ്പ് കരാറുകാര്‍ അവിടെ നിന്നുതന്നെയുള്ള മണലും മെറ്റിലും ഉപയോഗിച്ച് മൂടി തടിതപ്പി.
അത് വീണ്ടും കുഴിയായി യാത്രാക്ലേശം രൂക്ഷമായിരിക്കുകയാണ്. മഴമാറിയാല്‍ കുഴികള്‍ അടക്കാമെന്നും റോഡ് നന്നാക്കാമെന്നുമാണ് അധികൃതരുടെ വാഗ്ദാനം. താല്‍കാലികമായെങ്കിലും മഴ മാറിയിട്ടും അധികൃതര്‍ വാക്കുപാലിക്കുന്നില്ല.