ചവറ: നിരവധി രോഗികള്‍ ചികിത്സ തേടിയെത്തുന്ന കുറ്റിവട്ടം ഗവ. ആയുര്‍വേദ ആശുപത്രിയില്‍ രോഗികള്‍ക്ക് ആശ്വാസമായി വിശ്രമകേന്ദ്രം ഒരുക്കി. താലൂക്കിന്റെ വിവിധ ഭാഗങ്ങളില്‍ നിന്നായി ദിവസവും നൂറ് കണക്കിന് പേരാണ് ചികിത്സക്കായി എത്തുന്നത്.
എന്നാല്‍ കാത്തിരിക്കാനോ വിശ്രമിക്കാനോ സൗകര്യമില്ലാത്തത് കാരണം ആശുപത്രി തിണ്ണയായിരുന്നു അഭയം.
പന്മന ഗ്രാമപഞ്ചായത്തിന്റെ 2016-17 വാര്‍ഷിക പദ്ധതിയില്‍ ഉള്‍പ്പെടുത്തി പത്ത് ലക്ഷം രൂപ ചിലവഴിച്ചാണ് ടോയ്‌ലറ്റ് സംവിധാനത്തോടെ പുതിയ കെട്ടിടം നിര്‍മിച്ചത്. കെട്ടിടത്തിന്റെ ഉദ്ഘാടനം എന്‍. വിജയന്‍ പിള്ള എം.എല്‍.എ നിര്‍വഹിച്ചു.
ഗ്രാമപഞ്ചായത്ത് പ്രസിഡന്റ് ശാലിനി അധ്യക്ഷയായി. കെ.ജി വിശ്വംഭരന്‍, ജെ. അനില്‍, കറുകത്തല ഇസ്മയില്‍, ഹസീന, നിഷാ വാഹിദ്, അഷ്‌റഫ് ഖാന്‍, ഡോ.ഷീബ സംസാരിച്ചു.