തിരൂര്‍: സ്വര്‍ണാഭരണ നിര്‍മാണശാലയില്‍ നിന്ന് സ്വര്‍ണക്കട്ടികളും പണവും മോഷ്ടിച്ച കേസില്‍ രണ്ട് മഹാരാഷ്ട്ര സ്വദേശികള്‍ അറസ്റ്റില്‍. മഹാരാഷ്ട്ര സാംഗ്‌ളി ബൊര്‍ഗാവ് സ്വദേശികളായ സന്ദീപ് പാട്ടീല്‍ (35), വിശാല്‍ മസ്‌കെ ( 29 ) എന്നിവരാണ് മഹാരാഷ്ട്രയിലെ ഇസ്‌ളാംപൂരിലെ ഒളിത്താവളത്തില്‍ കഴിയുന്നതിനിടെ അറസ്റ്റിലായത്.
തിരൂരിലെ വിനായക് ഗോള്‍ഡ് വര്‍ക്‌സില്‍ നിന്നാണ് 15 ലക്ഷം രൂപയോളം വിലമതിക്കുന്ന സ്വര്‍ണക്കട്ടിയും നാല് ലക്ഷം രൂപയും മോഷണം പോയത്. മോഷണം നടന്ന ശേഷം സ്വര്‍ണാഭരണ നിര്‍മാണശാലയിലെ ജീവനക്കാരനായ സന്ദീപ് പാട്ടീലിനെ കാണാതായിരുന്നു. മോഷണം നടന്ന സ്ഥാപനത്തിലെയും സമീപത്തെയും സി.സി.ടി.വി ദൃശ്യങ്ങള്‍ പരിശോധിച്ചതില്‍ നിന്നാണ് പ്രതികളെ പിടികൂടാനായത്. സ്വര്‍ണവും പണവും മോഷ്ടിച്ച് തിരൂരില്‍ നിന്ന് രക്ഷപ്പെട്ട പ്രതി മഹാരാഷ്ട്രയില്‍ പല സ്ഥലങ്ങളിലായി ഒളിവില്‍ കഴിയുകയായിരുന്നു. ഇയാളുടെ സുഹൃത്തും മഹാരാഷ്ട്രയിലെ ഇസ്‌ളാംപൂര്‍ സ്വദേശിയും നിരവധി ക്രിമിനല്‍ കേസുകളില്‍ പ്രതിയുമായ വിശാല്‍ മഹാദേവ് മസ്‌കെയുമായി ചേര്‍ന്ന് മോഷണ മുതല്‍ ഉപയോഗിച്ച് സ്വര്‍ണാഭരണനിര്‍മാണ ശാല തുടങ്ങുന്നതിനുള്ള ശ്രമത്തിനിടെയാണ് ഒളിത്താവളത്തില്‍ നിന്ന് തിരൂര്‍ പൊലിസ് സാഹസികമായി ഇവരെ പിടികൂടിയത്.
ഇസ്‌ളാംപൂര്‍ കോടതിയില്‍ ഹാജരാക്കിയ പ്രതികളെ ട്രാന്‍സിറ്റ് വാറണ്ട് പ്രകാരം തിരൂര്‍ കോടതിയില്‍ ഹാജരാക്കി. തിരൂര്‍ ഡി.വൈ.എസ്.പി സുരേഷ് ബാബുവിന്റെ നിര്‍ദേശപ്രകാരം സര്‍ക്കിള്‍ ഇന്‍സ്‌പെക്ടര്‍ ടി.പി ഫര്‍ഷാദിന്റെ നേതൃത്വത്തില്‍ തിരൂര്‍ എസ്.ഐ മാരായ അബ്ദുല്‍ ജലീല്‍, കെ.പ്രമോദ്, സീനിയര്‍ സിവില്‍ പൊലിസ് ഓഫിസര്‍ രാജേഷ് എന്നിവര്‍ ചേര്‍ന്നാണ് പ്രതികളെ പിടികൂടിയത്.