കണ്ണുര്‍: അറുപത്തിമൂന്നാമത് സംസ്ഥാന സ്‌കൂള്‍ കായികമേളയ്ക്ക്  ശനിയാഴ്ച  കണ്ണൂരില്‍ തുടക്കമാവും. കണ്ണൂര്‍ സര്‍വകലാശാലയുടെ മാങ്ങാട്ടുപറമ്പ് കാമ്പസില്‍ പുതിയതായി നിര്‍മിച്ച സിന്തറ്റിക് സ്റ്റേഡിയത്തിലണ് മേള നടക്കുന്നത്. 98 ഇനങ്ങളിലായി എകദേശം രണ്ടായിരത്തോളം കുട്ടികള്‍ പങ്കെടുക്കുന്ന കായികമേള നാളെ കായിക മന്ത്രി ഇ.പി ജയരാജന്‍ ഉദ്ഘാടനം ചെയ്യും. ഒളിമ്പ്യന്‍ ടിന്റു ലൂക്ക മേളയ്ക്ക് ദീപം തെളിക്കും. അത്‌ലറ്റുകളുടെ മാര്‍ച്ച്പാസ്സിനു ശേഷമാണ് ഉദ്ഘാടനച്ചടങ്ങ്.

മത്സരത്തിനുള്ള രജിസ്‌ട്രേഷന്‍ നാളെ പകല്‍ രണ്ടിന് കാമ്പസിലെ ഇന്‍ഡോര്‍ സ്റ്റേഡിയത്തില്‍ ആരംഭിക്കും. ശനിയാഴ്ച രാവിലെ ഏഴിന് സീനിയര്‍ ആണ്‍കുട്ടികളുടെ 3000 മീറ്റര്‍ ഓട്ടത്തോടെ മേള തുടങ്ങും. ഒമ്പതിന് സ്റ്റേഡിയത്തില്‍ കായികോത്സവപതാക ഉയരും. ആദ്യദിവസം 18 ഫൈനല്‍ ഉള്‍പ്പെടെ 30 മത്സരങ്ങളുണ്ടാവും. രണ്ടാംദിനം സീനിയര്‍ ആണ്‍കുട്ടികളുടെ 5000 മീറ്റര്‍ നടത്തത്തോടെയും മൂന്നാംദിനം ജൂനിയര്‍ ആണ്‍കുട്ടികളുടെ നടത്തത്തോടെയുമാണ് മേള തുടങ്ങുക. രണ്ടാംദിനം 28 ഫൈനലും മൂന്നാം ദിനം 34 ഫൈനലും അരങ്ങേറും.

സമാപനദിനമായ 19ന് രാവിലെ 6.30ന് ആണ്‍കുട്ടികളുടെ ക്രോസ്‌കണ്‍ട്രിയോടെ മത്സരം തുടങ്ങും. 23 ഫൈനലുണ്ട്. സീനിയര്‍ ആണ്‍കുട്ടികളുടെ 4400 റിലേയോടെ കായികോത്സവം സമാപിക്കും