മട്ടന്നൂര്‍:മുനിസിപ്പല്‍ ഓഫിസിനോട് ചേര്‍ന്നു കിടക്കുന്നതാണ് മിനി നഗര്‍വാര്‍ഡ്. കഴിഞ്ഞ തവണത്തെ തെരഞ്ഞെടുപ്പില്‍ യു.ഡി.എഫിലെ മുസ്‌ലിം ലീഗ് സ്ഥാനാര്‍ഥി വി.എന്‍ മുഹമ്മദ് വന്‍ ഭൂരിപക്ഷത്തിലാണ് ഇവിടെ വിജയിച്ചത്. യു.ഡി.എഫിന് കൂടുതല്‍  സ്വാധീനമുള്ള വാര്‍ഡാണിത്. 2012ല്‍ നടന്ന  തെരഞ്ഞെടുപ്പില്‍ വി.എന്‍ മുഹമ്മദ് 476  വോട്ട് നേടിയേപ്പോള്‍  എല്‍.ഡി.എഫ് സ്ഥാനാര്‍ഥി ഐ.എന്‍.എല്ലിന്റെ പി.എ  താജുദ്ദീന് 193 വോട്ട് മാത്രമാണ്  കിട്ടിയത്. എന്നാല്‍ വാര്‍ഡ് വിഭജനത്തോടെയാണ് കൊക്കയില്‍ വാര്‍ഡ് എന്നതിന് പകരം മിനി നഗര്‍ വാര്‍ഡ് എന്നാക്കി മാറ്റിയത്.പാലോട്ടുപള്ളിയുടെ ഒരു ഭാഗം ഇതിലേക്ക് വന്നു ചേരുകയും ഈ വാര്‍ഡിന്റെ ഒരു ഭാഗം ഉത്തിയൂര്‍ വാര്‍ഡിലേക്ക് പോകുകയും ചെയ്തു. വനിതാ സംവരണമായതോടെ യു.ഡി.എഫിനു വേണ്ടി മുസ്‌ലിം ലീഗിന്റെ മുബീന ഷാഹിദും എല്‍.ഡി.എഫിനു വേണ്ടി സി.പി.എമ്മിന്റെ എം.വിലാസിനിയുമാണ്  മത്സരരംഗത്തുള്ളത്.
മട്ടന്നൂരില്‍ പുതുതായി നിര്‍മിക്കേണ്ട ബസ്സ്റ്റാന്‍ഡിന് സ്ഥലം വകയിരുത്താന്‍ തീരുമാനിച്ചത് ഇവിടെയായിരുന്നു.എന്നാല്‍ പല കാരണങ്ങളാല്‍ നഗരസഭ അതിനു തയാറായില്ല. കൊക്കയില്‍ റോഡ്,  പൊലിസ് സ്റ്റേഷനു മുമ്പില്‍ നിന്നുമുള്ള പ്രത്യേക നടപ്പാത എന്നിങ്ങനെ ഗതാഗത സൗകര്യം ഉറപ്പാക്കാനുള്ള പ്രവര്‍ത്തനങ്ങള്‍ നടത്തിയെന്നും കഴിഞ്ഞ നഗരസഭ ഭരണ സമിതി തെരുവ് വിളക്കുകള്‍ സ്ഥാപിക്കാതെ വന്നപ്പോള്‍ സ്വകാര്യ വ്യക്തികളെ കണ്ടെത്തി വിളക്കുകള്‍ സ്ഥാപിക്കാന്‍ കഴിഞ്ഞിട്ടുണ്ടെന്നും മുന്‍ കൗണ്‍സിലര്‍ വി.എന്‍ മുഹമ്മദ് പറഞ്ഞു.