റിയാദ്: ലോകത്തെ ഏറ്റവും വലിയ ഓഹരി വില്‍പ്പനക്കൊരുങ്ങിയ സഊദി ദേശീയ എണ്ണകമ്പനിയായ സഊദി അരാംകോയുടെ ആദ്യഘട്ട ഓഹരികള്‍ വിപണിയില്‍ എത്തിയതോടെ ഓഹരി വിപണിയില്‍ വന്‍കുതിപ്പ്. ചരിത്രത്തിലെ തന്നെ ഏറ്റവും ഉയര്‍ന്ന സൂചകത്തിലേക്ക് ഓഹരി വില്‍പന ഉയരുന്നതാണ് ആദ്യഘട്ടത്തില്‍ തന്നെ കണ്ടത്. 20,000 കോടി ഷെയറുകളില്‍ ഇതിന്റെ ഒന്നര ശതമാനത്തിന് തുല്യമായ 300 കോടി ഓഹരികളാണ് ഇനീഷ്യല്‍ പബ്ലിക് ഓഫറിംഗിലൂടെ വില്‍ക്കുന്നത്. സഊദി പ്രാദേശിക ഓഹരി വിപണിയായ തദാവുലില്‍ 30 റിയാല്‍ മുതല്‍ 32 റിയാല്‍ വരെയാണ് ഓഹരി വില്‍പ്പനക്ക് എത്തിയിരിക്കുന്നത്. ആകെ അര ശതമാനം (100 കോടി) ഓഹരികളാണ് വ്യക്തികള്‍ക്കു വേണ്ടി നീക്കിവച്ചിരിക്കുന്നത്. ഒരു ശതമാനം (200 കോടി) ഓഹരികള്‍ കമ്പനികള്‍ക്കു വേണ്ടിയാണ് നീക്കിവച്ചിരിക്കുന്നത്.

സഊദി സ്റ്റോക്ക് മാര്‍ക്കറ്റായ 'തദാവുല്‍' മുഖേന ആഭ്യന്തര വിപണിയിലാണ് അരാംകോ ഇപ്പോള്‍ ലിസ്റ്റ് ചെയ്യപ്പെട്ടത്. യോഗ്യതകളുടെ മാനദണ്ഡത്തില്‍ വിദേശികള്‍ക്കും ഇത് വാങ്ങാന്‍ സാധിക്കും. അടുത്ത വര്‍ഷത്തോടെ ലോക ഓഹരി വിപണിയിലേക്കും അരാംകോ പ്രവേശിക്കുമെന്നാണ് സൂചന. അതേസമയം, അരാംകോയുടെ മൂല്യം സഊദി വിപണിയില്‍ ലിസ്റ്റ് ചെയ്ത മുഴുവന്‍ ഓഹരികളുടെയും വിപണി മൂല്യത്തിന്റെ മൂന്നിരട്ടിയിലേറെയാണെന്ന് കണക്കുകള്‍ വ്യക്തമാക്കുന്നു.

കമ്പനിയുടെ 20,000 കോടി ഷെയറുകളില്‍ ഇതിന്റെ ഒന്നര ശതമാനത്തിന് തുല്യമായ 300 കോടി ഓഹരികള്‍ വില്‍ക്കുന്നതിലൂടെ ഓഹരി മൂല്യം 1.6 ട്രില്യണ്‍ ഡോളര്‍ മുതല്‍ 1.71 ട്രില്യണ്‍ ഡോളര്‍ വരെയാണെന്നാണ് (6 ട്രില്യണ്‍ റിയാല്‍ മുതല്‍ 6.4 ട്രില്യണ്‍ റിയാല്‍ വരെ) കണക്കാക്കുന്നത്. കഴിഞ്ഞ വ്യാഴാഴ്ചത്തെ കണക്കുകള്‍ പ്രകാരം സഊദി ഓഹരി വിപണിയില്‍ ലിസ്റ്റ് ചെയ്ത കമ്പനികളുടെ ഓഹരികളുടെ ആകെ മൂല്യം 1.87 ട്രില്യണ്‍ റിയാല്‍ (499 ബില്യണ്‍ ഡോളര്‍) ആണ്. ഓഹരി വില്‍പനയിലൂടെ 2,400 കോടി ഡോളര്‍ മുതല്‍ 2,560 കോടി ഡോളര്‍ (9,000 കോടി റിയാല്‍ മുതല്‍ 9,600 കോടി റിയാല്‍) വരെ ലഭിക്കുമെന്നാണ് കണക്കാക്കുന്നത്. ഇതോടെ ചരിത്രത്തിലെ ഏറ്റവും വിലയ ഐ.പി.ഒ ആകുമെന്നാണ് കരുതുന്നത്.