കണ്ണൂര്‍: ആവശ്യത്തിനു കണ്ടക്ടര്‍മാരില്ലാത്തതിനാല്‍ കെ.എസ്.ആര്‍.ടി.സി കണ്ണൂര്‍ ഡിപ്പോയില്‍ നിന്നുള്ള ഷെഡ്യൂളുകള്‍ മുന്നറിയിപ്പില്ലാതെ വെട്ടിക്കുറയ്ക്കുന്നു. ഇതുകാരണം മലയോര മേഖലയിലടക്കമുള്ള യാത്രക്കാരാണ് ദുരിതത്തിലാകുന്നത്. ഡിപ്പോയില്‍ 300 കണ്ടക്ടര്‍മാര്‍ വേണ്ടിടത്ത് 250 പേര്‍മാത്രമാണ് ഇപ്പോഴുള്ളത്. അതില്‍ 15 ഓളം പേര്‍ ദീര്‍ഘകാല അവധിയിലുമാണ്. 102 ഓളം ഷെഡ്യൂളുകളുള്ള കണ്ണൂര്‍ ഡിപ്പോയില്‍ ഇതുമൂലം ദിവസവും ആറും പത്തും ട്രിപ്പുകള്‍ റദ്ദാക്കേണ്ട സ്ഥിതിയാണുള്ളത്. 120 ബസുകള്‍ സര്‍വിസ് നടത്തുന്നുണ്ടെങ്കിലും ഇതില്‍ പത്തോളം ബസുകള്‍ അറ്റകുറ്റപ്പണികള്‍ക്കായി കയറ്റിയിട്ടിരിക്കുകയാണ്. എന്നാല്‍ ആവശ്യത്തിലധികം ഡ്രൈവര്‍മാര്‍ ഡിപ്പോയിലുണ്ട്. ഇവര്‍ക്ക് പലപ്പോഴും ബസ് ലഭിക്കാത്തതിനാല്‍ ഡിപ്പോയിലെത്തിയ ശേഷം മടങ്ങുകയാണ് പതിവ്. 15 ഓളം വനിതാ കണ്ടക്ടര്‍മാര്‍ ഡിപ്പോയിലുണ്ട്. അവരില്‍ പലരും പ്രസവാവധി ആറുമാസത്തിലേറെ എടുക്കുന്നതിനാല്‍ ഒഴിവുകള്‍ നികത്തത്താനാകാത്ത സ്ഥിതിയാണുള്ളത്. പതിനൊന്ന് ദീര്‍ഘ ദൂര സര്‍വീസുകള്‍ നടത്തുന്ന ഡിപ്പോയില്‍ സ്‌പെയര്‍പാര്‍ടുസുകളുടെ ലഭ്യത കുറവും ബസുകളെ കട്ടപ്പുറത്താക്കുന്നു.  ശബരിമല തീര്‍ഥാടനത്തിനായും കൊട്ടിയൂര്‍ തീര്‍ഥാടനത്തിനായും ബസുകളും ജീവനക്കാരെയും വിട്ടുകൊടുക്കേണ്ടി വരുന്നതും ദിവസേനയുള്ള ഷെഡ്യൂളുകളില്‍ മാറ്റംവരാന്‍ കാരണമാകുന്നു.  ഷെഡ്യൂളുകള്‍ നിര്‍ത്തലാക്കുന്നതു വന്‍ സാമ്പത്തിക നഷ്ടമാണ് കെ.എസ്.ആര്‍.ടി.സിക്ക് വരുത്തുന്നത്. പലപ്പോഴും ജനങ്ങളുടെ പ്രതിഷേധത്തെ ഇല്ലാതാക്കാന്‍ ഓരോ ഭാഗങ്ങളിലേക്കും ഓരോ തവണമാത്രം സര്‍വിസ് നടത്തുകയാണ് ഇപ്പോള്‍ ചെയ്യുന്നത്. എത്രയും വേഗം ഒഴിവുള്ള കണ്ടക്ടര്‍ തസ്തികയില്‍ ജീവനക്കാരെ നിയമിക്കണമെന്ന് ആവശ്യം ഉയരുന്നുണ്ട്.