തിരൂര്‍: പറവണ്ണയില ഓട്ടോ ഡ്രൈവര്‍ കളരിക്കല്‍ മുഹമ്മദ് യാസീനെ കുത്തിക്കൊലപ്പെടുത്തിയ കേസില്‍ രണ്ടുപേര്‍ കൂടി അറസ്റ്റില്‍. രണ്ടാംപ്രതി പള്ളാത്ത് നൗഷാദിനെ വിദേശത്തേക്ക് രക്ഷപ്പെടാന്‍ സഹായിച്ച രണ്ട് പേരെയാണ് തിരൂര്‍ സി.ഐ പി. അബ്ദുല്‍ ബഷീറും സംഘവും അറസ്റ്റ് ചെയ്തത്. മൂന്നാംപ്രതി പറവണ്ണ കമ്മാക്കാന്റെ പുരക്കല്‍ ഷാഹുല്‍ ഹമീദ് (32), നാലാം പ്രതി പറവണ്ണ പള്ളാത്ത് സുല്‍ത്താന്‍ (30) എന്നിവരാണ് അറസ്റ്റിലായത്. തിരൂര്‍ മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. കേസില്‍ ഒന്നാം പ്രതി പള്ളാത്ത് ആദം, സഹോദരന്‍ പള്ളാത്ത് നൗഷാദ് എന്നിവരെ പൊലിസ് നേരത്തെ അറസ്റ്റ് ചെയ്തിരുന്നു.
കഴിഞ്ഞ മാസം 16നാണ് കേസിനാസ്പദമായ സംഭവം. കേസിലെ കൂട്ടുപ്രതികള്‍ക്കെതിരേ പൊലിസ് നടപടിയെടുക്കുന്നില്ലെന്ന ആരോപണം ശക്തമായ സാഹചര്യത്തിലാണ് അറസ്റ്റുണ്ടായത്. കൊലപാതകത്തിന് ശേഷം വിദേശത്തേക്ക് കടന്ന പ്രതി നൗഷാദിനെ പൊലിസ് സമ്മര്‍ദം ചെലുത്തി നാട്ടിലെത്തിച്ച് അറസ്റ്റ് ചെയ്യുകയായിരുന്നു. റിമാന്‍ഡിലായ പ്രതികളെ കോടതിയില്‍നിന്ന് കസ്റ്റഡിയില്‍ വാങ്ങി വിശദമായി ചോദ്യം ചെയ്യുമെന്നും തെളിവെടുപ്പ് നടത്തുമെന്നും എസ്.ഐ സുമേഷ് സുധാകര്‍ പറഞ്ഞു.