മാങ്ങാട്ടുപറമ്പ്: സ്‌പോര്‍ട്‌സ് ജേണോഴ്‌സ് പുരസ്‌കാരം അക്ഷയിനും പ്രതിഭയ്ക്കും. കായിക മാധ്യമ പ്രവര്‍ത്തകരുടെ കൂട്ടായ്മയായ സ്‌പോര്‍ട്‌സ് ജേണേര്‍സ് നല്‍കുന്ന സംസ്ഥാന സ്‌കൂള്‍ അത്‌ലറ്റിക് ചാംപ്യന്‍ഷിപ്പിലെ മികച്ച ജൂനിയര്‍ വിഭാഗം താരങ്ങള്‍ക്കുള്ള കായിക പ്രതിഭ പുരസ്‌കാരത്തിന് തിരുവനന്തപുരം ജി.വി രാജ സ്‌പോര്‍ട്‌സ് സ്‌കൂളിലെ ആര്‍. അക്ഷയും കോഴിക്കോട് ബാലുശേരി ജി.ജി.എച്ച്.എസ്.എസിലെ പ്രതിഭ വര്‍ഗീസും തെരഞ്ഞെടുക്കപ്പെട്ടു. യൂനിവേഴ്‌സിറ്റി സ്റ്റേഡിയത്തില്‍ നടന്ന ചടങ്ങില്‍ കായിക വിദ്യാഭ്യാസ ജോയിന്റ് ഡയരക്ടര്‍ ഡോ. ചാക്കോ ജോസഫ് പുരസ്‌കാരങ്ങള്‍ സമ്മാനിച്ചു. 

400 മീറ്റര്‍, 400 മീറ്റര്‍ ഹര്‍ഡില്‍സ്, 800 മീറ്റര്‍ എന്നിവയില്‍ സ്വര്‍ണം നേടിയ അക്ഷയ് മികച്ച പ്രകടനമാണ് ട്രാക്കില്‍ കാഴ്ചവച്ചത്. 4-400 മീറ്റര്‍ റിലേയില്‍ തിരുവനന്തപുരത്തിന് സ്വര്‍ണം സമ്മാനിച്ച സംഘത്തിലും അക്ഷയ് അംഗമായിരുന്നു. 

എസ്. സത്യനാണ് അക്ഷയുടെ പരിശീലകന്‍. പി.ടി ഉഷയുടെ ശിഷ്യയായ പ്രതിഭ വഗീസ് 400 മീറ്റര്‍, 400 മീറ്റര്‍ ഹര്‍ഡില്‍സ് ഇനങ്ങളില്‍ സ്വര്‍ണം നേടിയാണ് പുരസ്‌കാരത്തിന് അര്‍ഹയായത്.