തിരുവനന്തപുരം: വിവാദമായ വാളയാര്‍ കേസില്‍ പൊലിസിന് നേരെ കടുത്ത വിമര്‍ശനമുയര്‍ത്തി സര്‍ക്കാര്‍ ഹൈക്കോടതിയില്‍ അപ്പീല്‍ നല്‍കി. വാളയാറില്‍ ലൈംഗിക പീഡനത്തിനിരയായ സഹോദരിമാരായ രണ്ട് പെണ്‍കുട്ടികളുടെ മരണം സംബന്ധിച്ച കേസില്‍ പുനരന്വേഷണവും ആവശ്യപ്പെട്ടിട്ടുണ്ട്. പ്രാഥമിക അന്വേഷണത്തില്‍ വീഴ്ചയുണ്ടായെന്ന് സര്‍ക്കാര്‍ സത്യവാങ്മൂലത്തില്‍ വ്യക്തമാക്കി. ആദ്യമരണത്തിലും ലൈംഗിക പീഡനം ഉണ്ടായതായും എന്നാല്‍ ആ രീതിയില്‍ ആദ്യകേസില്‍ അന്വേഷണം ഉണ്ടായില്ലെന്നും സത്യവാങ്മൂലത്തില്‍ ചൂണ്ടിക്കാണിക്കുന്നുണ്ട്. കൂറുമാറിയ സാക്ഷികള്‍ക്കെതിരെ നടപടി സ്വീകരിച്ചിട്ടില്ലെന്നും അപ്പീലില്‍ വ്യക്തമാക്കുന്നു.

ആദ്യ പോസ്റ്റ്‌മോര്‍ട്ടം റിപ്പോര്‍ട്ട് അവഗണിച്ചു. കൂറുമാറിയ സാക്ഷികള്‍ക്ക് എതിരെ നടപടി സ്വീകരിച്ചില്ല. അന്തിമ റിപ്പോര്‍ട്ട് സമര്‍പ്പിച്ച ശേഷം പൊലിസും പ്രോസിക്യൂഷനും കൂടിയാലോചന നടത്തിയില്ല. കേസില്‍ തുടരന്വേഷണവും തുടര്‍ വിചാരണയും അനിവാര്യമാണെന്നും ഹര്‍ജിയില്‍ ആവശ്യപ്പെടുന്നുണ്ട്.

വാളയാറില്‍ മരിച്ച ആദ്യത്തെ പെണ്‍കുട്ടി ലൈംഗിക പീഡനത്തിന് ഇരയായെങ്കിലും ആ തരത്തിലുള്ള അന്വേഷണം ഉണ്ടായില്ലെന്ന് ഹര്‍ജിയില്‍ ചൂണ്ടിക്കാട്ടുന്നു.
52 ദിവസത്തെ ഇടവേളയിലാണ് 13ഉം 10 വയസുള്ള സഹോദരിമാരെ തൂങ്ങിമരിച്ചനിലയില്‍ കണ്ടെത്തിയത്.