കണയങ്കോട് പാലത്തിന്

മുകളില്‍നിന്നാണ്
മഴ പുഴയിലേക്ക് ചാടിയത്.
വലയെറിയുന്ന മീന്‍പിടുത്തക്കാരെ
കണ്ടപ്പോഴാണ് മഴ
ഇടിമിന്നലിനെ കൂട്ടുവിളിച്ചത്.
കൊയിലാണ്ടിക്കു പോകുന്ന
ബസിനുള്ളില്‍ നിന്നൊരു
പെണ്‍കുട്ടി മഴക്കവിത
പുറത്തേക്കെറിഞ്ഞു
അത് ഫേസ്ബുക്കിലൂടെ ഒഴുകി...
പുഴയുടെ മാറിടത്തില്‍
മഴ പ്രണയമെഴുതി.
തോണിപ്പാട്ടിന്റെ തിരയിളക്കത്തില്‍
പ്രണയം കരക്കടിഞ്ഞു.
മഴയ്‌ക്കൊപ്പം സെല്‍ഫിയെടുത്ത
തവളയെ ചേര വിഴുങ്ങി...
കുന്തമുനയായി പെയ്ത മഴയെ
പുഴ കടലിലേക്ക് തള്ളിയകറ്റി.
എന്നിട്ടും മഴ പെയ്യുകയാണ്
പുഴ നിറയുന്നതറിയാതെ...