ന്യൂഡല്‍ഹി: സ്പ്രിന്റര്‍ ദ്യുതി ചന്ദിന് ലോക അത്‌ലറ്റിക് ചാംപ്യന്‍ഷിപ്പില്‍ പങ്കെടുക്കാന്‍ അനുമതി. വൈല്‍ഡ് കാര്‍ഡ് എന്‍ട്രി വഴിയാണ് ദ്യുതിക്ക് അന്താരാഷ്ട്ര അത്‌ലറ്റിക് ഫെഡറേഷന്‍ അനുമതി നല്‍കിയത്. ഭിന്ന ലിംഗ വിഷയത്തില്‍ ദ്യുതിയെ അന്താരാഷ്ട്ര മത്സരങ്ങളില്‍ നിന്ന് വിലക്കിയ ഐ.എ.എ.എഫിന്റെ തീരുമാനം കോര്‍ട്ട് ഓഫ് ആര്‍ബിട്രേഷന്‍ ഫോര്‍ സ്‌പോര്‍ട്‌സ് രണ്ട് മാസത്തേക്ക് മരവിപ്പിച്ചതിനെ തുടര്‍ന്നാണ് താരത്തിന് മത്സരിക്കാന്‍ പ്രത്യേക അനുമതി ലഭിച്ചത്. സെപ്റ്റംബര്‍ വരെ ദ്യുതിക്ക് അന്താരാഷ്ട്ര മത്സരങ്ങളില്‍ പങ്കെടുക്കാം. വനിതകളുടെ 100 മീറ്ററില്‍ ലണ്ടനില്‍ മത്സരിക്കാന്‍ 11.26 സെക്കന്‍ഡാണ് യോഗ്യതാ മാര്‍ക്ക്. എന്നാല്‍ ദ്യുതിയുടെ മികച്ച സമയം 11.30 സെക്കന്‍ഡാണ്. 56 താരങ്ങള്‍ക്കാണ് ലോക പോരാട്ടത്തിന് അവസരം. പട്ടിക തികയ്ക്കാനുള്ള അവസരം ഫെഡറേഷനുള്ളതിനാല്‍ 103ാം റാങ്കിലുള്ള ദ്യുതിക്ക് വൈല്‍ഡ് കാര്‍ഡ് എന്‍ട്രി അനുവദിക്കുകയായിരുന്നു.