ഫലസ്തീന്‍ അഭയാര്‍ത്ഥികള്‍ക്കായുള്ള യുഎന്‍ ഏജന്‍സിയെ (യുഎന്‍ആര്‍ഡബ്ല്യുഎ) നിരോധിച്ച് ഇസ്‌റാഈല്‍. ഇസ്‌റാഈലിലും അധിനിവിഷ്ട ജറുസലേമിലും പ്രവര്‍ത്തിക്കുന്നതില്‍ നിന്ന് യുഎന്‍ ഏജന്‍സിയെ വിലക്കുന്ന ബില്ലിന് തിങ്കളാഴ്ച ഇസ്‌റാഈല്‍ പാര്‍ലമെന്റ് അംഗീകാരം നല്‍കി. അമേരിക്കയുടെ എതിര്‍പ്പ് അവഗണിച്ചാണിത്.

92 അംഗങ്ങള്‍ അനുകൂലമായും 10 പേര്‍ എതിര്‍ത്തുമാണ് ബില്‍ പാസ്സാക്കിയത്. ഏഴ് പതിറ്റാണ്ടിലേറെയായി ഫലസ്തീന്‍ പ്രദേശങ്ങളില്‍ അഭയാര്‍ഥികള്‍ക്കും മറ്റും അവശ്യ സഹായവും സഹായവും നല്‍കി വരുന്ന യുഎന്‍ ഏജന്‍സിയാണിത്. 

അതേസമയം യുഎന്‍ആര്‍ഡബ്ല്യുഎയുടെ നിരോധനം ഗാസയിലെ മാനുഷിക സഹായ പ്രവര്‍ത്തനങ്ങള്‍ക്ക് തിരിച്ചടിയാകുമെന്ന് വിദഗ്ധര്‍ അഭിപ്രായപ്പെടുന്നു. അമേരിക്ക, യു.കെ, ജര്‍മ്മനി എന്നിവയുള്‍പ്പെടെ നിരവധി രാജ്യങ്ങള്‍ ഇസ്രയേലിന്റെ ഈ നീക്കത്തില്‍ ഗുരുതരമായ ആശങ്ക പ്രകടിപ്പിച്ചു. 

ഇത്തരം നിയമങ്ങള്‍ നടപ്പാക്കുന്നത് ഇസ്‌റാഈല്‍- ഫലസ്തീന്‍ സംഘര്‍ഷം പരിഹരിക്കുന്നതിന് സഹായിക്കില്ലെന്നും മേഖലയിലെ മൊത്തത്തിലുള്ള സമാധാനത്തിനും സുരക്ഷയ്ക്കും ഹാനികരമാവുമെന്നും യുഎന്‍ സെക്രട്ടറി ജനറല്‍ അന്റോണിയോ ഗുട്ടെരസ് പറഞ്ഞു. ഇസ്‌റാഈല്‍ നീക്കം ഫലസ്തീന്‍കാരുടെ ദുരിതം വര്‍ധിപ്പിക്കുകയേ ഉള്ളൂവെന്ന് അന്‍വയുടെ മേധാവി ഫിലിപ്പ് ലസാരിനിയും പ്രതികരിച്ചു.