ന്യൂഡല്‍ഹി: മഹാരാഷ്ട്രയിലെ അര്‍ധരാത്രിയിലെ അട്ടിമറി അവധിദിനത്തില്‍ കോടതി തുറന്നു പരിഗണിച്ച് സുപ്രിംകോടതി. സര്‍ക്കാര്‍ രൂപീകരണവുമായി ബന്ധപ്പെട്ട രേഖകള്‍ ഇന്ന് രാവിലെ 10.30ന് കോടതിയില്‍ ഹാജരാക്കാന്‍ ജസ്റ്റിസുമാരായ എന്‍.വി രമണ, അശോക് ഭൂഷണ്‍, സഞ്ജീവ് ഖന്ന എന്നിവരടങ്ങിയ ബെഞ്ച് ഉത്തരവിട്ടു. അതോടൊപ്പം കേന്ദ്ര സര്‍ക്കാര്‍, മഹാരാഷ്ട്ര സര്‍ക്കാര്‍, മുഖ്യമന്ത്രി ദേവേന്ദ്ര ഫഡ്‌നാവിസ്, ഉപമുഖ്യമന്ത്രി അജിത് പവാര്‍ എന്നിര്‍ക്ക് സുപ്രിംകോടതി നോട്ടിസയച്ചു. കേസില്‍ കോടതി ഇന്ന് വിധി പുറപ്പെടുവിക്കും. ഈ രേഖകള്‍ പരിശോധിച്ച ശേഷം 24 മണിക്കൂറിനുള്ളില്‍ വിശ്വാസവോട്ടെടുപ്പ് നടത്താന്‍ ഫഡ്‌നാവിസിനോട് ഉത്തരവിടണമെന്ന ഹരജയിലെ പ്രധാന ആവശ്യം പരിഗണിക്കാമെന്ന് കോടതി വ്യക്തമാക്കി.
ശിവസേന- എന്‍.സി.പി- കോണ്‍ഗ്രസ് സഖ്യ സര്‍ക്കാര്‍ അധികാരത്തിലേറാനിരിക്കെ ജനാധിപത്യമര്യാദകള്‍ ലംഘിച്ച് അര്‍ധരാത്രി ഫഡ്‌നാവിസിനെ മുഖ്യമന്ത്രിയാക്കിയ ഗവര്‍ണറുടെ നടപടി ചോദ്യം ചെയ്ത് ശിവസേന- എന്‍.സി.പി- കോണ്‍ഗ്രസ് സഖ്യമാണ് സുപ്രിംകോടതിയെ സമീപിച്ചത്. കേസില്‍ അവധിദിവസം കണക്കിലെടുക്കാതെ അടിയന്തരമായി വാദം കേള്‍ക്കണമെന്ന ആവശ്യം സുപ്രിംകോടതി അംഗീകരിക്കുകയായിരുന്നു.
ഫഡ്‌നാവിസ് ഭൂരിപക്ഷം അവകാശപ്പെട്ട് ഗവര്‍ണര്‍ക്ക് നല്‍കിയ കത്ത്, ഫഡ്‌നാവിസിനെ മന്ത്രിസഭയുണ്ടാക്കാന്‍ ക്ഷണിച്ചുള്ള ഗവര്‍ണറുടെ കത്ത് തുടങ്ങിയ രേഖകള്‍ ഉള്‍പ്പെടെയുള്ളവയാണ് ഹാജരാക്കേണ്ടത്. എന്‍.സി.പി എം.എല്‍.എമാരുടെ പിന്തുണ വാഗ്ദാനം ചെയ്ത അജിത് പവാര്‍ നല്‍കിയ കത്തും ഇതോടൊപ്പം ഹാജരാക്കണം. ഈ കത്തുകള്‍ കോടതിയില്‍ നിര്‍ണായകമാകും.
ഫഡ്‌നാവിസിന്റെ കത്ത് വ്യാജമാണെന്നും എന്‍.സി.പിയുടെ ആഭ്യന്തര യോഗത്തില്‍ എം.എല്‍.എമാര്‍ ഒപ്പിട്ട കത്ത് അജിത് പവാര്‍ മോഷ്ടിച്ച് പിന്തുണ നല്‍കിയ കത്തെന്ന് അവകാശപ്പെട്ട് കൈമാറുകയായിരുന്നുവെന്ന് ശരത് പവാര്‍ ആരോപിച്ചിരുന്നു.
ഒരു മണിക്കൂര്‍ നീണ്ട വാദംകേള്‍ക്കലിനൊടുവിലാണ് കോടതി ഇന്ന് വിധി പറയാമെന്ന് വ്യക്തമാക്കിയത്. പ്രഥമദൃഷ്ട്യാ ഭൂരിപക്ഷമുണ്ടെന്ന് ബോധ്യപ്പെടാതെയാണ് ഗവര്‍ണര്‍ ഫഡ്‌നാവിസിനെ സര്‍ക്കാര്‍ രൂപീകരിക്കാന്‍ വിളിച്ചതെന്ന് ഹരജിക്കാരുടെ അഭിഭാഷകര്‍ ചൂണ്ടിക്കാട്ടി.
ശിവസേനയ്ക്കായി മുതിര്‍ന്ന അഭിഭാഷകന്‍ കപില്‍ സിബല്‍, എന്‍.സി.പിക്കു വേണ്ടി അഭിഷേക് മനു സിങ്‌വി, ബി.ജെ.പിക്കു വേണ്ടി മുകുള്‍ രോഹ്തകി, സോളിസിറ്റര്‍ ജനറല്‍ തുഷാര്‍ മേത്ത എന്നിവരാണ് കോടതിയില്‍ ഹാജരായത്.