മലപ്പുറം: അടുത്ത ലോക്‌സഭാ തെരഞ്ഞെടുപ്പില്‍ ജില്ലയിലെ പ്രായപൂര്‍ത്തിയായ മുഴുവന്‍ ഭിന്നശേഷി വോട്ടര്‍മാരെയും പോളിങ് ബൂത്തിലെത്തിക്കാന്‍ നടപടി സ്വീകരിക്കുമെന്ന് ജില്ലാ കലക്ടര്‍ അമിത് മീണ. ഇതിന്റെ ഭാഗമായി ഭിന്നശേഷിക്കാരെ മുഴുവന്‍ വോട്ടര്‍ പട്ടികയില്‍ ഉള്‍പ്പെടുത്തുന്നത് ഉറപ്പാക്കാന്‍ ജില്ലാ കലക്ടര്‍ ചെയര്‍മാനായ മോണിറ്ററിങ് കമ്മിറ്റി രൂപീകരിച്ചു. പ്രവര്‍ത്തനങ്ങളുടെ മേല്‍ നോട്ടത്തിനായി സാമൂഹ്യനീതി ഓഫിസര്‍ നോഡല്‍ ഓഫിസറായി പ്രവര്‍ത്തിക്കും. ഇതിനു പുറമെ പ്രവര്‍ത്തനങ്ങള്‍ക്ക് വേഗത കൂട്ടുന്നതിനും ഏകോപനത്തിനുമായി നിയമസഭാ മണ്ഡലതലത്തിലും മോണിറ്ററിങ് സമിതികള്‍ രൂപീകരിക്കും.
തെരഞ്ഞെടുപ്പ് സമയത്ത് ഭിന്നശേഷിക്കാര്‍ക്ക് പോളിങ് ബൂത്തിലെത്താന്‍ സര്‍ക്കാര്‍ സൗജന്യമായി വീടുകളില്‍ വാഹനം എത്തിക്കും. ഇതിനായി വാഹനങ്ങള്‍ വാടകക്ക് എടുത്തുനല്‍കും. തദ്ദേശ സ്വയംഭരണ സ്ഥാപനങ്ങളുമായി സഹകരിച്ച് ഭിന്നശേഷിക്കാരെ കണ്ടെത്തി വോട്ടര്‍ പട്ടികയില്‍ പേര് ചേര്‍ക്കാനായി തഹസില്‍ദാര്‍മാര്‍ വീട്ടിലെത്തും. ബൂത്ത് ലെവല്‍ ഏജന്റുമാരുടെ സഹകരണത്തോടെയാണ് ഭിന്നശേഷിക്കാരെ പട്ടികയില്‍ ചേര്‍ക്കുന്ന പ്രവര്‍ത്തനം നടത്തുക. ജില്ലയിലെ മുഴുവന്‍ പോളിങ് സ്റ്റേഷനുകളിലും റാമ്പ് സൗകര്യം ഉറപ്പാക്കും. പോളിങ് സ്റ്റേഷനായി ഉപയോഗിക്കുന്ന മുഴുവന്‍ സ്‌കൂളുകളിലും റാമ്പ് സൗകര്യം ഉറപ്പാക്കാന്‍ വിദ്യാഭ്യാസ ഡെപ്യൂട്ടി ഡയരക്ടര്‍ക്ക് നിര്‍ദ്ദേശം നല്‍കിയിട്ടുണ്ട്. മുഴുവന്‍ പോളിങ് സ്റ്റേഷനുകളിലും അടിസ്ഥാന സൗകര്യങ്ങള്‍ ഉള്‍പ്പെടെ ലഭ്യമാക്കുന്നതിനും നടപടി സ്വീകരിക്കും.
കലക്ടറേറ്റില്‍ നടന്ന യോഗത്തില്‍ ജില്ലാ സാമൂഹ്യനീതി ഓഫിസര്‍ പി.എ തസ്‌നിം, ഇലക്ഷന്‍ ഡെപ്യൂട്ടി കലക്ടര്‍ പി. പ്രസന്നകുമാരി തുടങ്ങിയവരും സംബന്ധിച്ചു.