ചെറുതോണി (ഇടുക്കി): ബുധനാഴ്ച നടന്ന എം.ജി യൂനിവേഴ്‌സിറ്റി ഒന്നാം വര്‍ഷ ബിരുദ പരീക്ഷയില്‍ കോപ്പിയടിച്ചതായി കണ്ടെത്തിയ വിദ്യാര്‍ഥി ആത്മഹത്യ ചെയ്തു. കഞ്ഞിക്കുഴി വിജയന്‍സിറ്റി കിളിയിക്കല്‍ ബാബുവിന്റെ മകന്‍ അജില്‍(21) ആണ് മരിച്ചത്. ഇന്നലെ വൈകിട്ട് അഞ്ചോടെ വീടിന് സമീപത്തെ മരത്തില്‍ തൂങ്ങിയ നിലയില്‍ കണ്ടെത്തുകയായിരുന്നു.
ബുധനാഴ്ച സ്വകാര്യ കോളജില്‍ നടന്ന പരീക്ഷയില്‍ അജില്‍ കോപ്പിയടിച്ചത് അധ്യാപകര്‍ കണ്ടെത്തിയിരുന്നു. യൂനിവേഴ്‌സിറ്റിയില്‍ നിന്നുള്ള പ്രതിനിധിയും പരീക്ഷാ സമയത്ത് കോളജില്‍ ഉണ്ടായിരുന്നു. കോപ്പിയടിച്ച വിവരം അധ്യാപകരും മറ്റ് വിദ്യാര്‍ഥികളും അറിഞ്ഞതിനെ തുടര്‍ന്നുള്ള മാനസിക വിഷമത്തെ തുടര്‍ന്നാണ് ജീവനൊടുക്കിയതെന്നാണ് പൊലിസിന്റെ നിഗമനം. മൃതദേഹം പോസ്റ്റ്‌മോര്‍ട്ടത്തിന് ശേഷം ഇന്നുരാവിലെബന്ധുക്കള്‍ക്ക് വിട്ടുനല്‍കും. മാതാവ്: സാലി.