തിരുവനന്തപുരം: ആരോഗ്യ രംഗത്ത് കേരളത്തിന് മറ്റൊരു അംഗീകാരം കൂടി. ലോകാരോഗ്യ സംഘടനയുടെ വേള്‍ഡ് ഹിയറിങ് ഫോറത്തില്‍ കേരളത്തേയും ഉള്‍പ്പെടുത്തി. കോഴിക്കോട് മെഡിക്കല്‍ കോളജിലെ ഇ.എന്‍.ടി. വിഭാഗത്തിനാണ് വേള്‍ഡ് ഹിയറിങ് ഫോറത്തില്‍ അംഗത്വം ലഭിച്ചത്.
ഇവിടെ നടപ്പിലാക്കി വരുന്ന കോക്ലിയര്‍ ഇംപ്ലാന്റേഷന്‍, ന്യൂബോണ്‍ സ്‌ക്രീനിങ്, സ്പീച്ച് തെറാപ്പി, സര്‍ക്കാര്‍ പദ്ധതികള്‍ എന്നിവ വിലയിരുത്തിയാണ് അംഗീകാരം നല്‍കിയത്. കേരളത്തിലെ ഹിയറിങ് മേഖലയിലെ പ്രവര്‍ത്തനങ്ങള്‍ ലോകത്തെ വിവിധ രാജ്യങ്ങളില്‍ ലോകാരോഗ്യ സംഘടന മാതൃകയായി എത്തിക്കാന്‍ ഇതിലൂടെ കഴിയും. കേരളത്തിലാദ്യമാണ് ഇങ്ങനെയൊരംഗീകാരം ലഭിക്കുന്നത്. എയിംസിനോട് കിടപിടിക്കുന്ന സൗകര്യങ്ങളാണ് കോഴിക്കോട് മെഡിക്കല്‍ കോളജിലെ ഇ.എന്‍.ടി. വിഭാഗത്തില്‍ സജ്ജമാക്കിയിട്ടുള്ളത്.