പഴയങ്ങാടി: പുതിയങ്ങാടി ക്ഷേത്ര ഭണ്ഡാരത്തില്‍നിന്നു കാണിക്ക കവര്‍ച്ച ചെയ്തു. പുതിയങ്ങാടിയിലെ തായ്പരദേവത കുറുമാത്തൂര്‍ ഭഗവതി ക്ഷേത്ര (ചേരിക്കല്‍ വളപ്പിലെകോട്ടം)ത്തിലാണ് ശ്രീകോവിലിന്റെയും ഭണ്ഡാരത്തിന്റെയും പൂട്ട് തകര്‍ത്ത നിലയില്‍ കണ്ടെത്തിയത്. 

കഴിഞ്ഞ ദിവസം രാത്രിയോടെയാണ് സംഭവം. രാവിലെ ക്ഷേത്രത്തില്‍ വിളക്ക് തെളിക്കാനെത്തിയ ജീവനക്കാരനാണ് ശ്രീകോവിലിന്റെ വാതില്‍ തുറന്ന നിലയില്‍ കണ്ടത്.
തുടര്‍ന്ന് നാട്ടുകാരെയും ക്ഷേത്രഭാരവാഹികളെയും വിവരമറിയിച്ചു. കളിയാട്ടത്തിനോടനുബന്ധിച്ചു പുതുതായി നിര്‍മിച്ച ഭണ്ഡാരം പൊളിച്ച് പണം കവര്‍ന്നിട്ടുണ്ട്. വിവരമറിഞ്ഞ് പഴയങ്ങാടി എസ്.ഐ പി.ബി സജീവന്റെ നേതൃത്വത്തിലുള്ള പൊലിസ് സംഘം സ്ഥലത്തെത്തി അന്വേഷണം നടത്തി. ക്ഷേത്രം ഭാരവാഹി ടി. കണ്ണന്റെ പരാതിയില്‍ പൊലിസ് കേസെടുത്തു.