കല്ലമ്പലം: ആറ്റിങ്ങല്‍ എല്‍.ഡി.എഫ് സര്‍ക്കാര്‍ സര്‍വിസ് മേഖലയെ തകര്‍ക്കാന്‍ ശ്രമിക്കുകയാണെന്ന് കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍ പറഞ്ഞു. കേരള മുന്‍സിപ്പല്‍ ആന്‍ഡ് കോര്‍പ്പറേഷന്‍ സ്റ്റാഫ് അസോസിയേഷന്‍ സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മുഖ്യമന്ത്രി സ്വേച്ഛാധിപതിയെപ്പോലെയാണ് പെരുമാറുന്നത്. പഞ്ചായത്ത് രാജ് നഗരപാലിക സംവിധാനത്തെ പരാജയപ്പെടുത്താനാണ് സര്‍ക്കാര്‍ ശ്രമം. നഗരസഭ ജീവനക്കാരെ പിഴിഞ്ഞ് കൊണ്ടാണ് സര്‍ക്കാര്‍ മുന്നോട്ട് പോകുന്നത്. സി.പി.എമ്മും ബി.ജെ.പിയുമായുള്ള വലിയൊരു ഗൂഡാലോചനയുടെ ഭാഗമാണ് ശബരിമല വിഷയമെന്നും മുല്ലപ്പള്ളി പറഞ്ഞു. കെ.എം.സി.എസ്.എ സംസ്ഥാന പ്രസിഡന്റ് പി.ഐ. ജേക്കബ്‌സണ്‍ അധ്യക്ഷനായി. മഹിളാ കോണ്‍ഗ്രസ് സംസ്ഥാന പ്രസിഡന്റ് ലതികാസുഭാഷ്, കെ.എം.സി.എസ്.എ സംസ്ഥാന ജനറല്‍ സെക്രട്ടറി എം. വസന്തന്‍, സംസ്ഥാന സെക്രട്ടറി ഇ. വിന്‍സെന്റ്, മുന്‍ സംസ്ഥാന പ്രസിഡന്റുമാരായ പി.കെ ദിനേശന്‍, കൈമനം പ്രഭാകരന്‍, മുന്‍ സെക്രട്ടറി എ.കെ പുഷ്‌കരന്‍, സംസ്ഥാന വൈസ് പ്രസിഡന്റ് പി.എം ബാബുരാജ്, സെക്രട്ടറി കെ. വേണു, ഐ.എന്‍.ടി.യു.സി. ദേശീയ നിര്‍വാഹക സമിതിയംഗം വി.എസ് അജിത് കുമാര്‍ പങ്കെടുത്തു.