പാലക്കാട്: റെയില്‍വേ, പ്രതിരോധ, വിമാനത്താവള മേഖലവരെ സ്വകാര്യവല്‍ക്കരിക്കാനുള്ള നീക്കമാണ് കേന്ദ്രസര്‍ക്കാര്‍ നടത്തുന്നതെന്ന്്് സി.ഐ.ടി.യു സംസ്ഥാന ജനറല്‍ സെക്രട്ടറി എളമരം കരീം. അങ്കണവാടി വര്‍ക്കേഴ്‌സ് ആന്‍ഡ് ഹെല്‍പ്പേഴ്‌സ് അസോസിയേഷന്‍ സംസ്ഥാന സമ്മേളനത്തിന്റെ പ്രതിനിധി സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദേഹം.
നവ ഉദാരവല്‍കരണ നയങ്ങള്‍ നടപ്പിലാക്കുന്ന കേന്ദ്രസര്‍ക്കാര്‍ ജനജീവിതം ദുസഹമാക്കിയെന്നും അവശ്യവസ്തുക്കളുടെ വിലനിയന്ത്രണത്തിനായി ഒരു നടപടിയും സ്വീകരിക്കുന്നില്ലെന്നും അദ്ദേഹം പറഞ്ഞു.
ഒരു വര്‍ഷം രണ്ടുകോടി തൊഴിലുകളാണ് നരേന്ദ്ര മോദി സര്‍ക്കാര്‍ വാഗ്ദാനം ചെയ്തത്. തൊഴിലില്ലാതെ നിരവധി പേര്‍ പുറത്തുനില്‍ക്കുന്നത് തൊഴില്‍ ചെയ്യുന്ന നിരവധി പേരുടെ അവകാശങ്ങളെയാണ് ബാധിക്കുന്നതെന്ന് അദ്ദേഹം പറഞ്ഞു. ഭരണത്തിലെത്തിയ ശേഷമുള്ള ഉപതെരഞ്ഞെടുപ്പുകളില്‍ ബി.ജെ.പി കടുത്ത തോല്‍വിയാണ് ഏറ്റു വാങ്ങിയത്. കേന്ദ്രസര്‍ക്കാരും സംസ്ഥാന സര്‍ക്കാരും തമ്മില്‍ രാവും പകലും പോലുള്ള വ്യത്യാസമാണുള്ളത്. എല്‍.ഡി.എഫ് സര്‍ക്കാര്‍ പൊതുവിദ്യാഭ്യാസ ആരോഗ്യ രംഗത്തടക്കം മികച്ച നേട്ടമാണ് ഉണ്ടാക്കുന്നതന്നെ് എളമരം കരീം പറഞ്ഞു.
എം.ബി രാജേഷ് എം.പി സ്വാഗതതവും അസോസിയേഷന്‍ പ്രസിഡന്റ് കെ.പി മേരി അധ്യക്ഷതയും വഹിച്ചു. തുടര്‍ന്ന് വൈകിട്ട് ഏഴിന് അനുമോദന സദസും നടന്നു. ഇന്ന് രാവിലെ പ്രതിനിധി സമ്മേളനം സി.ഐ.ടി.യു അഖിലേന്ത്യ സെക്രട്ടറി കെ.കെ ദിവാകരന്‍ ഉദ്ഘാടനം ചെയ്യും. രണ്ടിന് അങ്കണവാടി ജീവനക്കാരുടെയും കുടുംബാംഗങ്ങളുടെയും പ്രകടനം നടക്കും. മൂന്നിന് കോട്ടമൈതാനത്ത് നടക്കുന്ന പൊതുസമ്മേളനം മന്ത്രി എ.കെ ബാലന്‍ ഉദ്ഘാടനം ചെയ്യും.