റിയാദ്: ആഫ്രിക്കന്‍ രാജ്യങ്ങളിലെ സാഹില്‍ ഗ്രൂപ്പ് രാജ്യങ്ങള്‍ക്ക് സഊദിയുടെ നൂറു മില്യണ്‍ യൂറോ സാമ്പത്തിക സഹായം പ്രഖ്യാപിച്ചു. തീവ്രവാദ വിരുദ്ധ പ്രവര്‍ത്തനത്തിനായാണ് ജി 5 സാഹില്‍ ഗ്രൂപ്പ് രാജ്യങ്ങളായ ആഫ്രിക്കയിലെ മാലി, മൗറിത്താന, നൈഗര്‍, ബുര്‍കിന ഫാസോ, ഛാഡ് എന്നീ അഞ്ചു രാജ്യങ്ങള്‍ക്ക് 113 മില്യണ്‍ ഡോളറിലധികം വരുന്ന സാമ്പത്തിക സഹായം പ്രഖ്യാപിച്ചത്

മൗറിത്താന്‍ തലസ്ഥാനമായ നോവക്‌ചോട്ടില്‍ 2019-2021 കാലയളവില്‍ സാഹില്‍ അംഗ രാജ്യങ്ങള്‍ക്ക് വേണ്ടി നടക്കുന്ന പ്രിയോരിറ്റി ഇന്‍വെസ്റ്റ്‌മെന്റ് പ്രോഗ്രാം (പി ഐ പി) ക്ക് വേണ്ടി ജി 5 സാഹില്‍ സഹായികളുടെയും ധന സഹായം നല്‍കുന്ന രാജ്യങ്ങളുടെയും കോര്‍ഡിനേഷന്‍ സമ്മേളന ഉദ്ഘാടന പരിപാടിയില്‍ സഊദിയുടെ ആഫ്രിക്കന്‍ രാജ്യങ്ങളുടെ ചുമതലയുള്ള മന്ത്രി അഹമ്മദ് ഖതാന്‍ ആണ് ഇക്കാര്യം പ്രഖ്യാപിച്ചത്.

തുകയുടെ പകുതി അഞ്ചു രാജ്യങ്ങളുടെ പ്രിയോരിറ്റി ഇന്‍വെസ്റ്റ്‌മെന്റ്‌സഹായത്തിനായും പകുതി പണം പ്രിയോരിറ്റി ഇന്‍വെസ്റ്റ്‌മെന്റ് പ്രോഗ്രാം പദ്ധതിക്കായും നല്‍കാന്‍ സഊദി ഭരണാധികാരി സല്‍മാന്‍ രാജാവ് ഉത്തരവിട്ടതായും അദ്ദേഹം കൂട്ടിച്ചേര്‍ത്തു. ആകെ 2.7 ബില്യണ്‍ ഡോളര്‍ സഹായമാണ് സമ്മേളനത്തില്‍ പ്രഖ്യാപിക്കപ്പെട്ടത്
ഈ രാജ്യങ്ങളിലെ ഏകദേശം എല്ലാ മേഖലകളിലും തീവ്രവാദത്തെ നേരിടാനുള്ള നാല്‍പതു പദ്ധതികകള്‍ക്ക് ആവശ്യമായ സഹായമായി ഇത് മാറുമെന്ന് നൈഗര്‍ പ്രസിഡന്റ് മഹമദൗ ഇസൗഫൗ പറഞ്ഞു.