കട്ടപ്പന: കമ്പംമെട്ട് ചെക്ക്‌പോസ്റ്റിനു സമീപം തമിഴ്‌നാടിന്റെ ഭൂമിയില്‍ പൊലിസ് കണ്ടെയിനര്‍ സ്ഥാപിക്കാന്‍ തമിഴ്‌നാട് അധികൃതര്‍ എത്തിയത് മേഖലയില്‍ ആശങ്കയ്ക്കിടയാക്കി. ഇതേ തുടര്‍ന്ന് കമ്പമെട്ടില്‍ കൂടുതല്‍ കേരളാ പൊലിസിനെ വിന്യസിച്ചു. എന്നാല്‍, തമിഴ്‌നാട് അവരുടെ ഭൂമിയില്‍ തന്നെയാണ് കണ്ടെയ്‌നര്‍ സ്ഥാപിച്ചത് എന്നതിനാല്‍ പ്രശ്‌നങ്ങളൊന്നുമുണ്ടായില്ല. അതിര്‍ത്തിയില്‍ ഭൂമിയുടെ അതിരുതിരിക്കലുമായി ബന്ധപ്പെട്ട് തര്‍ക്കം നിലനില്‍ക്കുന്നതിനാല്‍ തമിഴ്‌നാടിന്റെ നീക്കത്തെ സംശയത്തോടെയാണ് നോക്കിക്കണ്ടത്. ഇതേതുടര്‍ന്നാണ് മുന്‍കരുതല്‍ എന്ന നിലയില്‍ പൊലിസിനെ വിന്യസിച്ചത്.
ആഴ്ചകള്‍ക്കു മുമ്പ് തമിഴ്‌നാടിന്റെ ഭൂമി കൈയേറിയെന്ന് ആരോപിച്ച് തമിഴ്‌നാട് കേരളത്തിന്റെ ഭൂമിയില്‍ ആധിപത്യം സ്ഥാപിക്കാന്‍ നീക്കം നടത്തിയിരുന്നു. ഇതേതുടര്‍ന്ന് തേനി - ഇടുക്കി ജില്ലാ കലക്്ടര്‍മാര്‍ ഇടപെട്ട് സംയുക്ത സര്‍വേയ്ക്ക് നടപടി കൈക്കൊണ്ടിരുന്നു.
എന്നാല്‍ പിന്നീട് സര്‍വേ നിര്‍ത്തിവയ്ക്കുകയായിരുന്നു. ഇതിനിടെയാണ് തമിഴ്‌നാട് പൊലിസ് കണ്ടെയ്‌നര്‍ സ്ഥാപിക്കാന്‍ എത്തിയത്. പ്രശ്‌നം രൂക്ഷമായ സാഹചര്യത്തില്‍ അതിര്‍ത്തിയില്‍ മന്ത്രി എം. എം. മണി, അഡ്വ. ജോയ്‌സ് ജോര്‍ജ് എം.പി തുടങ്ങിയവര്‍ എത്തി വിവരങ്ങള്‍ ആരായുകയും ആവശ്യമായ നടപടികള്‍ കൈക്കൊള്ളുമെന്ന് വ്യക്തമാക്കുകയും ചെയ്തിരുന്നു.
രാത്രി വൈകിയും പ്രദേശത്ത് പൊലിസ് സംഘം തുടരുകയാണ്. വന്‍ പൊലിസ് സന്നാഹത്തോടെയാണ് കണ്ടെയ്‌നര്‍ സ്ഥാപിക്കാന്‍ തമിഴ്‌നാട് അധികൃതര്‍ എത്തിയത്.