ആലപ്പുഴ: പാര്‍ട്ടി ചട്ടക്കൂടുകള്‍ക്ക് വിരുദ്ധമായി അത്യാര്‍ഭാടപൂര്‍വം മകന്റെ വിവഹസല്‍ക്കാരം നടത്തിയതിന് ഏരിയാ കമ്മിറ്റി അംഗത്തെ സസ്‌പെന്‍ഡ് ചെയ്ത് സി.പി.എം. ആലപ്പുഴ കഞ്ഞിക്കുഴി ഏരിയാ കമ്മിറ്റി അംഗം സി.വി മോഹനനെയാണ് നേതൃത്വം ആറ് മാസത്തേക്ക് സസ്‌പെന്‍ഡ് ചെയ്തിരിക്കുന്നത്.

ശനിയാഴ്ച ഇദ്ദേഹം ഉള്‍പ്പെടെ പങ്കെടുത്ത ഏരിയാ കമ്മിറ്റി യോഗത്തിന്റേതാണ് തീരുമാനം. ചേര്‍ത്തല അരീപ്പറമ്പില്‍ കഴിഞ്ഞ 13നായിരുന്നു ഇയാളുടെ മകന്റെ വിവാഹത്തോടനുബന്ധിച്ചുള്ള സല്‍ക്കാരം സംഘടിപ്പിച്ചത്. സല്‍ക്കാരത്തോടനുബന്ധിച്ച് വലിയ സംവിധാനങ്ങളോടുകൂടിയ ഡി.ജെ. പാര്‍ട്ടിയും സംഘടിപ്പിച്ചിരുന്നു.

ഡി.ജെ പാര്‍ട്ടിക്കിടയില്‍ നൃത്തം ചെയ്തവര്‍ തമ്മില്‍ പിന്നീട് വാക്കേറ്റവും സംഘര്‍ഷവും ഉണ്ടാവുകയും ചെയ്തു. ഇതിനിടയില്‍ സല്‍ക്കാരത്തില്‍ പങ്കെടുക്കാനെത്തിയ ജില്ലാ സെക്രട്ടറിയുടെ കാര്‍ നൃത്തം ചെയ്തവര്‍ തടയുകയും ചെയ്തു. ഇത് സ്ഥിതിഗതികള്‍ കൂടുതല്‍ രൂക്ഷമാക്കുകയായിരുന്നു.

അതേസമയം വിവാഹ സല്‍ക്കാരം ആസൂത്രണം ചെയ്തത് മകനാണെന്നാണ് മനോഹരന്‍ പാര്‍ട്ടിക്ക നല്‍കിയ വിശദീകരണത്തില്‍ പറഞ്ഞതെന്നാണ് ലഭിക്കുന്ന വിവരം. എന്നാല്‍ ഇത് ചെവിക്കൊള്ളാന്‍ നേതൃത്വം തയാറാവാഞ്ഞതിനെ തുടര്‍ന്നാണ് നടപടി എടുക്കാന്‍ തീരുമാനിച്ചത്.