കൊല്ലം: മലയോര മേഖലാ നിവാസികള്‍ വീണ്ടും  പുലിപ്പേടിയിലായി.
ജനവാസ മേഖലയായ ആര്യങ്കാവില്‍ കഴിഞ്ഞ ദിവസം പുലി നാല് ആടുകളെ കൊന്നു. കടമാന്‍പാറ കോലംപള്ളിവീട്ടില്‍ ആന്റണിയുടെ തൊഴുത്തില്‍ കെട്ടിയിരുന്ന ആടുകളെയാണ് കൊന്നത്. ഒരു ആടിനെ തൊഴുത്തിന് സമീപത്ത് വച്ച് കൊന്നു തിന്നുകയും മറ്റ് രണ്ടെണ്ണത്തിനെ കടിച്ച് കീറി ഉപേക്ഷിക്കുകയുമായിരുന്നു. മറ്റൊരു ഒരു ആടിനെ പുലി കടിച്ച് കൊണ്ട് പോയതായും വീട്ടുടമ പറഞ്ഞു.
ശബ്ദം കേട്ടെങ്കിലും വീട്ടുകാര്‍ ഭയന്ന് പുറത്തിറങ്ങിയില്ല. ആര്യങ്കാവിലെ ഇസ്ഫീല്‍ഡ് എസ്‌റ്റേറ്റില്‍ മേയാന്‍ വിട്ട സെയ്ദുള്ളയുടെ പശുവിനെയും പുലി കൊന്നു തിന്നു. രണ്ട് ദിവസം മുമ്പ് ആര്യങ്കാവിലെ കരയാളര്‍മെത്തില്‍ മാത്യുവിന്റെ തൊഴുത്തില്‍ കെട്ടിയിരുന്ന പശുക്കിടാവിനെ പുലി കൊന്നിരുന്നു. പട്ടാപ്പകല്‍ പോലും ജനവാസ മേഖലയില്‍ പുലി ഇറങ്ങി വളര്‍ത്തുമൃഗങ്ങളെ കൊല്ലുന്നതിനാല്‍ മലയോരവാസികള്‍ ഭീതിയിലാണ്.
രണ്ട് വര്‍ഷത്തിനുള്ളില്‍ തെന്മല, ആര്യങ്കാവ് പഞ്ചായത്തുകളില്‍ പലയിടത്തും പുലി വളര്‍ത്ത് മൃഗങ്ങളെ കൊന്നു
തിന്നിരുന്നു. പുലിയെ പിടിക്കാന്‍ വനപാലകര്‍ ഉറുകുന്നില്‍ കൂട് സ്ഥാപിച്ചെങ്കിലും ഫലമുണ്ടായില്ല.