കളമശ്ശേരി: എസ്.കെ.എസ്.എസ്.എഫ് സംസ്ഥാന കമ്മറ്റിയുടെ ആതുര സേവന വിഭാഗമായി സഹചാരി റിലീഫ് സെല്ലിന്റെ കീഴില്‍ തുടക്കം കുറിക്കുന്ന 'സഹചാരി സെന്റര്‍' കളമശ്ശേരി മേഖലാ കമ്മറ്റിക്ക് കീഴില്‍ ആരംഭിക്കാന്‍ മേഖലാ കൗണ്‍സില്‍ യോഗം തീരുമാനിച്ചു. കങ്ങരപ്പടി ഇസ്‌ലാമിക് സെന്ററിലാണ് സെന്റര്‍ പ്രവര്‍ത്തനം ആരംഭിക്കുന്നത്.
യോഗം എസ്.കെ.എസ്.എസ്.എഫ് ജില്ലാ വൈസ് പ്രസിഡന്റ് സൈനുദ്ദീന്‍ വാഫി ഉദ്ഘാടനം ചെയ്തു. മേഖലാ പ്രസിഡന്റ് പി.എച്ച് അജാസ് അധ്യക്ഷത വഹിച്ചു. ജില്ലാ ജനറല്‍ സെക്രട്ടറി പി.എം ഫൈസല്‍ മുഖ്യപ്രഭാഷണം നടത്തി. 15ന് കളമശ്ശേരി മേഖലാ ഫ്രീഡം സ്‌ക്വയര്‍ രാവിലെ ഒമ്പതിന് കാക്കനാട് ചിറ്റേത്തുകരയില്‍ നടക്കും. വൈകിട്ട് ഏഴിന് കളമശേരിയില്‍ സമസ്ത സെക്രട്ടറി കെ ആലിക്കുട്ടി മുസ്‌ലിയാര്‍ക്ക് സമസ്ത ജില്ലാ കമ്മറ്റി നല്‍കുന്ന സ്വീകരണ സമ്മേളനം വിജയിപ്പിക്കാനും യോഗം തീരുമാനിച്ചു.
വിഖായ ജില്ലാ കണ്‍വീനര്‍ നിയാസ് മുണ്ടംപാലം, മേഖല ജനറല്‍ സെക്രട്ടറി അസ്‌ലം മണക്കാടന്‍, വൈസ് പ്രസിഡന്റ് എ.പി ബഷീര്‍, വര്‍ക്കിങ് സെക്രട്ടറി ആസിഫ് കാരുവള്ളി, ട്രഷറര്‍ മുഹമ്മദ് സാദിഖ് തുടങ്ങിയവര്‍ പ്രസംഗിച്ചു.