മണലൂര്‍: കുന്നത്തങ്ങാടി സേവന റോഡില്‍ വച്ച് വീട്ടുകാരെ ഓട്ടോയിലെത്തിയ ആള്‍ ആക്രമിക്കുകയും ഗൃഹനാഥനെ ചുറ്റിക കൊണ്ട് തലക്കടിക്കുകയും ചെയ്ത സംഭവത്തില്‍ സമീപ വാസിയായ ഓട്ടോ ഡ്രൈവറെ അന്തിക്കാട് എസ്.ഐ. സൂരജും സംഘവും അറസ്റ്റ് ചെയ്തു.
പരിസരവാസിയായ ചിറമ്മല്‍ ബൈജുവാണ് (45) പിടിയിലായത്. കുന്നത്തങ്ങാടി സ്റ്റാന്‍ഡിലെ ഓട്ടോ ഡ്രൈവറാണ്. തിങ്കളാഴ്ച വൈകീട്ട് നാലരയോടെ സേവന റോഡിലുള്ള പൂപ്പാടി ലാസറിന്റെ മകന്‍ സെബിയ്ക്കാണ് (59) ചുറ്റിക കൊണ്ട് തലയ്ക്കടിയേറ്റത്. ഇദ്ദേഹത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
നിര്‍മാണം നടക്കുന്ന വീട്ടില്‍ പോയി മടങ്ങുകയായിരുന്ന സെബിയേയും ഭാര്യ ലിസിയേയും ഓട്ടോയിലെത്തിയ ബൈജു തടഞ്ഞ് നിര്‍ത്തി ആക്രമിക്കുകയായിരുന്നു. കൈയിലുണ്ടായിരുന്ന ചുറ്റിക കൊണ്ട് തലയ്ക്കടിച്ചെന്നാണ് സെബി പറഞ്ഞത്. ലിസിയെ ആക്രമിക്കാനുള്ള ശ്രമം സെബി തടയുകയായിരുന്നു.
ഇതിനിടെ വീണ്ടും ആക്രമിക്കാനുള്ള ശ്രമം ഓടിക്കൂടിയ പരിസരവാസികള്‍ ഇടപെട്ടതോടെ ഉപേക്ഷിച്ച് ഓട്ടോയുമായി ഇയാള്‍ കടന്നുകളഞ്ഞു.
ഗൃഹനാഥനെ ചുറ്റിക കൊണ്ടടിച്ച് കൊല്ലാന്‍ ശ്രമിച്ച സംഭവത്തിനാണ് കേസ് എടുത്തത്. കോടതിയില്‍ ഹാജരാക്കിയ ബൈജുവിനെ റിമാന്‍ഡ് ചെയ്തു.