അംജദ് ഖാന്‍ റശീദി

തിരുവമ്പാടി: മദ്‌റസാ വിദ്യാര്‍ഥികളിലെ സര്‍ഗവൈഭവം കണ്ടെത്താന്‍ മദ്‌റസകള്‍ ഇസ്‌ലാമിക കലാമേളയുടെ തിരക്കിലേക്ക്.
സമസ്ത കേരള ജംഇയ്യത്തുല്‍ മുഅല്ലിമീനിന്റെ വിവിധ കമ്മിറ്റികളുടെ നേതൃത്വത്തിലാണ് കലാമേള നടക്കുന്നത്. രണ്ടു വര്‍ഷത്തിലൊരിക്കലാണ് അധ്യാപക-വിദ്യാര്‍ഥി മത്സരങ്ങള്‍ സംഘടിപ്പിക്കുന്നത്. 30 വര്‍ഷമായി നടന്നു വരുന്ന കലാമേളയുടെ റെയ്ഞ്ചുതല മത്സരം ഈ മാസം 31ന് പൂര്‍ത്തിയാകും.
മദ്‌റസാ ജേതാക്കള്‍ റെയ്ഞ്ചുതല മത്സരത്തിലും ഇവിടുത്തെ ജേതാക്കള്‍ മേഖലാ മത്സരത്തിലും മേഖലാ മത്സര ജേതാക്കള്‍ ജില്ലാ മത്സരത്തിലും പങ്കെടുക്കും. ജില്ലയില്‍ 58 റെയ്ഞ്ചുകളാണുള്ളത്. ജില്ലാ കമ്മിറ്റികള്‍ക്ക് കീഴിലുള്ള ആറു മേഖലകളിലെ മത്സരം പൂര്‍ത്തിയായ ശേഷമാകും ജില്ലാ മത്സരങ്ങള്‍ നടക്കുക.
ജനുവരി 12, 13 തിയതികളിലാണ് മേഖലാ മത്സരങ്ങള്‍. താമരശ്ശേരി മേഖല: കുട്ടമ്പൂര്‍ ദാറുല്‍ ഹിദായ (ഉണ്ണിക്കുളം റെയ്ഞ്ച്), കോഴിക്കോട് മേഖല: അരീക്കാട് അന്‍വാറുല്‍ ഇസ്‌ലാം മദ്‌റസ (നല്ലളം റെയ്ഞ്ച്), മാവൂര്‍ മേഖല: മണാശ്ശേരി എം.എം.ഒ മദ്‌റസ (മുക്കം റെയ്ഞ്ച്) എന്നിവിടങ്ങളില്‍ ജനുവരി 12നും കുറ്റ്യാടി മേഖല: ഉമ്മത്തൂര്‍ നജാത്തുല്‍ ഇസ്‌ലാം ഹയര്‍ സെക്കന്‍ഡറി മദ്‌റസ (പാറക്കടവ് റെയ്ഞ്ച്), വടകര മേഖല: കുഞ്ഞിപ്പള്ളി മഖ്ദൂം നഗര്‍ (അഴിയൂര്‍ റെയ്ഞ്ച്), കൊയിലാണ്ടി മേഖല: പള്ളിക്കര ഇല്‍മുല്‍ ഹുദാ മദ്‌റസ (പയ്യോളി റെയ്ഞ്ച്) എന്നിവടങ്ങളില്‍ ജനുവരി 13നും മേഖല മത്സരങ്ങള്‍ നടക്കും.
ജില്ലാ കലാമേള 27ന് മുക്കം റെയ്ഞ്ചിലെ ദാറുസ്വലാഹ് ഇസ്‌ലാമിക് അക്കാദമി കാംപസിലാണ്. സംസ്ഥാന കലാമേള ഫെബ്രുവരി 15, 16, 17 തിയതികളില്‍ കണ്ണൂര്‍ ജില്ലയിലെ തളിപ്പറമ്പില്‍ നടക്കും.
കഴിഞ്ഞ വര്‍ഷം മുതലാണ് മത്സര വിഭാഗത്തില്‍ കിഡീസും (1, 2 ക്ലാസുകള്‍) വിദ്യാര്‍ഥിനി ഫെസ്റ്റും ഉള്‍പ്പെടുത്തിയത്. കൈയെഴുത്ത് മാസികയാണ് വിദ്യാര്‍ഥിനി ഫെസ്റ്റിലെ ഇനം. കിഡീസ് വിഭാഗത്തിന്റേത് റെയ്ഞ്ച് മത്സരത്തോടെ സമാപിക്കും. ഇത്തവണ മത്സരങ്ങള്‍ പൂര്‍ണമായും ഓണ്‍ലൈന്‍ വഴിയാണ്. നിശ്ചിത ലിങ്കില്‍ യൂസര്‍ നെയിം, പാസ്‌വേഡ് നല്‍കി ഉപയോഗിക്കാം. ഇതോടെ മത്സരാര്‍ഥി, വേദി, സ്‌കോര്‍ ബോര്‍ഡ് ഉള്‍പ്പെടെയുള്ള മത്സരത്തിന്റെ ചിത്രം സിസ്റ്റത്തില്‍ ലഭ്യമാകും.