മുക്കം: മലയോര മേഖലയില്‍ ടിപ്പര്‍ അപകടങ്ങള്‍ പതിവായ സാഹചര്യത്തില്‍ ടിപ്പറുകള്‍ക്കെതിരേ കര്‍ശന നടപടിയുമായി ഉടമകളുടെ സംഘടനയായ ടിപ്പര്‍ എര്‍ത്ത് മൂവേഴ്‌സ് എക്യുപ്‌മെന്റ് ഓണേഴ്‌സ് ആന്‍ഡ് ഓപ്പറേറ്റേഴ്‌സ് വെല്‍ഫെയര്‍ അസോസിയേഷന്‍ രംഗത്ത്.
സംഘടന നടത്തിയ പഠനത്തില്‍ അമിതഭാരം വഹിച്ചുള്ള വാഹനങ്ങളാണ് ഭൂരിഭാഗം അപകടങ്ങള്‍ക്കും റോഡിന്റെ തകര്‍ച്ചയ്ക്കും കാരണമെന്ന് കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് പത്തു മുതല്‍ നടപടി ശക്തമാക്കാന്‍ തീരുമാനിച്ചത്. ജില്ലയില്‍ ഒരുദിവസം ഏറ്റവുമധികം ടിപ്പറുകള്‍ കടന്നുപോകുന്ന മുക്കത്ത് സംസ്ഥാനപാതയിലെ ഹോട്ടല്‍ മലയോരത്തിനടുത്തുള്ള പാലത്തിനും അമിതഭാരം കയറ്റിയ ടിപ്പര്‍ ലോറികള്‍ ഭീഷണിയാണ്. 50 വര്‍ഷത്തിലധികം പഴക്കമുള്ള പാലമാണിത്.
അതേസമയം ചില കമ്പനികളുടെ ടിപ്പറുകള്‍ യാതൊരുവിധ നിയമങ്ങളും പാലിക്കാതെ റോഡില്‍ ചീറിപ്പാഞ്ഞിട്ടും നടപടിയില്ലെന്നും പരാതി ഉയര്‍ന്നിട്ടുണ്ട്.
വാഹനങ്ങളില്‍ ചില പ്രത്യേക ചിഹ്നം പതിച്ചാല്‍ ചെക്കിങ്ങും നടത്താറില്ല.
ടിപ്പറുകള്‍ക്കെതിരേ നടപടി തുടങ്ങിയ സാഹചര്യത്തില്‍ മറുതന്ത്രവുമായി ടിപ്പര്‍ ഉടമകളും രംഗത്തെത്തി. ബാലുശ്ശേരി, താമരശേരി, ഉള്ള്യേരി, കൊയിലാണ്ടി ഭാഗങ്ങളില്‍ അനധികൃത സംഭരണ കേന്ദ്രങ്ങള്‍ നിര്‍മിച്ച് ഇവിടെ സാധനങ്ങള്‍ സ്റ്റോക്ക് ചെയ്യുകയാണ് ചെയ്യുന്നത്. മുക്കം മേഖലയില്‍ എന്തെങ്കിലും പ്രശ്‌നമുണ്ടായാല്‍ ഇത്തരം സ്ഥലങ്ങളില്‍നിന്ന് സാധനങ്ങള്‍ കയറ്റി ആവശ്യക്കാര്‍ക്ക് എത്തിച്ചു നല്‍കുകയാണ് ഇപ്പോള്‍ ചെയ്യുന്നത്.