പേരാമ്പ്ര: സ്‌കൂളിന്റെ ശോച്യാവസ്ഥ പരിഹരിക്കണമെന്നാവശ്യപ്പെട്ട് മേലടി ഉപജില്ലയിലെ മുയിപ്പോത്ത് പടിഞ്ഞാറക്കര എ.എല്‍.പി. സ്‌കൂള്‍ രക്ഷിതാക്കളുടെ നേതൃത്വത്തില്‍ നാട്ടുകാര്‍ ഉപരോധിച്ചു. പ്രശ്‌നം ചര്‍ച്ച ചെയ്യാന്‍ വന്ന എ.ഇ.ഒയെയും സമരക്കാര്‍ തടഞ്ഞുവച്ചു. മാനേജര്‍ ഒത്തുതീര്‍പ്പിന് തയ്യാറാവാത്തതിനെ തുടര്‍ന്ന് ഉപരോധ സമരം തുടരാന്‍ രക്ഷിതാക്കള്‍ തീരുമാനിച്ചു.
ഭൗതിക സൗകര്യം മെച്ചപ്പെടുത്തണമെന്നാവശ്യപ്പെട്ട പ്രധാനാധ്യാപകന്‍ വി. രാജീവനെ മാനേജര്‍ ഇ. പ്രസന്നന്‍ സസ്‌പെന്റ് ചെയ്തിരുന്നു. ഈ സസ്‌പെന്‍ഷന്‍ പിന്‍വലിക്കണമെന്നും രക്ഷിതാക്കള്‍ ആവശ്യപ്പെടുന്നുണ്ട്.
സമരത്തിന് പി.ടി.എ പ്രസിഡന്റ് റഷീദ് മുയിപ്പോത്ത്, എന്‍. പത്മനാഭന്‍ മാസ്റ്റര്‍, വാര്‍ഡ് മെംബര്‍ ജിജി രാഘവന്‍, എന്‍.എം കുഞ്ഞബ്ദുല്ല, രമാദേവി നാഗത്ത് താഴെ, സുനില്‍ നേതൃത്വം നല്‍കി.
ചെറുവണ്ണൂര്‍ പഞ്ചായത്ത് പ്രസിഡന്റ് കെ. പി. ബിജു, വൈസ് പ്രസിഡന്റ് നഫീസ കൊയിലോത്ത്, ബ്ലോക്ക് മെമ്പര്‍ എം.കെ സതി, വാര്‍ഡ് മെംബര്‍ വി.കെ. മോളി, കെ.പി.ടി വത്സന്‍, കുഞ്ഞികൃഷ്ണന്‍ നെടുങ്ങാപൊയില്‍ എന്നിവര്‍ സമരത്തിന് അഭിവാദ്യമര്‍പ്പിക്കാനെത്തി.