ജിദ്ദ: തികഞ്ഞ സൂഫിവര്യനും ശാദിലീ ഖാദിരീ ത്വരീഖത്തിന്റെ ശൈഖുമായിരുന്നു അത്തിപ്പറ്റ മുഹിയിദ്ദീന്‍ കുട്ടി മുസ്‌ലിയാരെന്ന് പ്രമുഖ സിറിയന്‍ പണ്ഡിതനും ശാദുലീ ഖാദിരീ ത്വരീഖത്തിന്റെ ഖലീഫയുമായ ശൈഖ് അമ്മാര്‍ സഅ്ദുദ്ദീന്‍ മുറാദ്.
വിവിധ രാജ്യക്കാരായ മശാഇഖുമാരുടേയും മുരീദുമാരുടേയും നേതൃത്വത്തില്‍ ജിദ്ദയില്‍ സംഘടിപ്പിച്ച അത്തിപ്പറ്റ ഉസ്താദ് അനുസ്മരണ സദസ്സിനെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
അത്തിപ്പറ്റ ഉസ്താദിന്റെ പ്രത്യേക ക്ഷണപ്രകാരം 2015 ല്‍ ശൈഖ് അമ്മാര്‍ മുറാദ് അദ്ദേഹത്തെ സന്ദര്‍ശിക്കാന്‍ കേരളത്തിലെത്തുകയും ഫത്ഹുല്‍ ഫത്താഹ്, ഗ്രെയ്‌സ് വാലി, വിവിധ മത സ്ഥാപനങ്ങള്‍ എന്നിവ സന്ദര്‍ശിക്കുകയും സമസ്ത പണ്ഡിതരുമായി കൂടിക്കാഴ്ച നടത്തുകയും ചെയ്തിരുന്നു.
ശൈഖ് സഅ്ദുദ്ദീന്‍ മുറാദിന്റെ സഹോദരന്‍ ശൈഖ് അനസ് മുറാദ് അടക്കം വ്യത്യസ്ത ദേശങ്ങളിലെ ധാരാളം വിശിഷ്ട വ്യക്തിത്വങ്ങളും സമസ്ത ഇസ്‌ലാമിക് സെന്റര്‍ ഭാരവാഹികളും നിരവധി പ്രവാസികളും പരിപാടിയില്‍ സംബന്ധിച്ചു. ശൈഖ് അമ്മാര്‍ മുറാദിന്റെ നേതൃത്വത്തില്‍ മയ്യിത്ത് നിസ്‌കാരവും നടന്നു.
സമസ്ത ഇസ്‌ലാമിക് സെന്റര്‍ സഊദി നാഷനല്‍ പ്രസിഡന്റ് സയ്യിദ് ഉബൈദുല്ല തങ്ങള്‍, അലി മൗലവി നാട്ടുക്കല്‍, ഇസ്മാഈല്‍ ഹാജി ചാലിയം, നജ്മുദ്ദീന്‍ ഹുദവി, മുജീബ് റഹ്മാനി, എന്‍.പി അബൂബക്കര്‍ ഹാജി, നാസര്‍ കാടാമ്പുഴ, സുഹൈല്‍ ഹുദവി, അന്‍വര്‍ ഹുദവി, മുഹമ്മദ് റഹ്മാനി തുടങ്ങിയവര്‍ സംബന്ധിച്ചു.