കൊല്‍ക്കത്ത: മുതിര്‍ന്ന സി.പി.എം നേതാവും ബംഗാളിലെ മുന്‍ വ്യവസായ മന്ത്രിയുമായ നിരുപം സെന്‍ അന്തരിച്ചു. ഇന്നലെ രാവിലെ കൊല്‍ക്കത്തയിലായിരുന്നു അന്ത്യം. 72 വയസായിരുന്നു.
മുന്‍ പോളിറ്റ് ബ്യൂറോ അംഗമായ അദ്ദേഹം രണ്ടുവര്‍ഷത്തോളമായി കിഡ്‌നി അസുഖത്തെ തുടര്‍ന്ന് ചികിത്സയിലായിരുന്നു. 2013ല്‍ മസ്തിഷ്‌കാഘാതമുണ്ടായതിനെ തുടര്‍ന്ന് അദ്ദേഹം പൊതു രംഗത്തുനിന്ന് വിട്ടുനില്‍ക്കുകയായിരുന്നു. ബര്‍ദ്വാന്‍ സൗത്ത് സീറ്റില്‍നിന്ന് 2001ലും 2006ലും ബംഗാള്‍ നിയമസഭയിലേക്ക് തെരഞ്ഞെടുക്കപ്പെട്ട അദ്ദേഹം ബുദ്ധദേബ് ഭട്ടാചാര്യ സര്‍ക്കാരില്‍ വ്യവസായ മന്ത്രിയായിരുന്നു. സര്‍ക്കാരിലെ രണ്ടാമനായി കണക്കാക്കിയിരുന്ന അദ്ദേഹം ബംഗാളിലെ വ്യവസായിക വല്‍ക്കരണത്തില്‍ നിര്‍ണായക സംഭാവനകളാണ് നല്‍കിയത്. 2015ലെ വിശാഖപട്ടണം പാര്‍ട്ടി കോണ്‍ഗ്രസിലാണ് അദ്ദേഹം പോളിറ്റ് ബ്യൂറോയില്‍നിന്നു മാറിയത്. തുടര്‍ന്ന് പാര്‍ട്ടിയുടെ മറ്റ് ഉന്നത സ്ഥാനങ്ങളില്‍നിന്നും അദ്ദേഹം മാറി നില്‍ക്കുകയായിരുന്നു.