സുല്‍ത്താന്‍ ബത്തേരി: ലോട്ടറി നമ്പര്‍ തിരുത്തി പണംതട്ടിയയാള്‍ അറസ്റ്റില്‍. തൃശൂര്‍ ഗുരുവായൂര്‍ മങ്കുന്നത്ത് എം.എസ് പജീഷാണ് വഞ്ചനാ കുറ്റത്തിന് അറസ്റ്റിലായത്. തട്ടിപ്പിനിരയായ ലോട്ടറി വില്‍പ്പനക്കാര്‍ ഞായറാഴ്ച്ച പ്രതിയെ തിരിച്ചറിഞ്ഞതോടെ ബത്തേരി പൊലിസില്‍ അറിയിക്കുകയായിരുന്നു.
അന്ന് രാവിലെതന്നെ പ്രതി ബത്തേരി മാരിയമ്മന്‍ കോവിലുനടുത്തുനിന്ന് പൊലിസ് പിടിയിലായി. സമ്മാനമുള്ള ലോട്ടറി നമ്പര്‍ പഴയ ലോട്ടറിയില്‍ പ്രിന്റ് ചെയ്ത് ചെറുകിട ലോട്ടറിക്കച്ചവടക്കാരില്‍ നിന്നും പണം വാങ്ങിയാണ് വഞ്ചിച്ചത്. സ്‌ക്രീന്‍ പ്രിന്റിങ് കോഴ്‌സ് കഴിഞ്ഞ പ്രതി അത്യാധുനിയ ഉപകരണങ്ങള്‍ ഉപയോഗിച്ച് അതിവിദഗ്ധമായാണ് ലോട്ടറിയില്‍ നമ്പര്‍ ചേര്‍ക്കുന്നത്. പഴയ ലോട്ടറിയിലെ നമ്പര്‍ ചുരണ്ടിമാറ്റിയ ശേഷം സമ്മാനമുള്ള ലോട്ടറിയുടെ നമ്പര്‍ പ്രിന്റ് ചെയ്യും. ഒറ്റ നോട്ടത്തില്‍ ഇത് കണ്ടുപിടിക്കാന്‍ സാധിക്കില്ല. വലിയ ലോട്ടറി ഏജന്‍സികളില്‍ ലോട്ടറി സ്‌കാന്‍ ചെയ്തപ്പോളാണ് നമ്പര്‍ രണ്ടാമത് പ്രിന്റ് ചെയ്തതാണെന്ന് കണ്ടെത്തിയത്. വൈത്തിരിയിലാണ് താമസം.
കൂടുതല്‍ തെളിവെടുപ്പിനായി പ്രതി താമസിച്ചിരുന്ന സ്ഥലത്ത് അന്വേഷണം നടത്തുമെന്ന് പൊലിസ് അറിയിച്ചു. സി.ഐ സുനില്‍, എസ്.ഐ ബിജു ആന്റണി എന്നിവരുടെ നേതൃത്വത്തിലുള്ള അന്വേഷണ സംഘമാണ് പ്രതിയെ പിടികൂടിയത്.