തിരുവനന്തപുരം: വനിതാ മതിലിലൂടെ സംസ്ഥാനത്തെ ജനങ്ങളെ ഭിന്നിപ്പിക്കുന്ന തെറ്റായ പ്രവര്‍ത്തനങ്ങള്‍ക്കാണ് മുഖ്യമന്ത്രി നേതൃത്വം നല്‍കുന്നതെന്ന് വി.എം സുധീരന്‍.
സര്‍ക്കാര്‍ സംവിധാനത്തിന്റെ മുഴുവന്‍ ശ്രദ്ധയും മതില്‍ തീര്‍ക്കുന്നതില്‍ കേന്ദ്രീകരിച്ചതുകൊണ്ട് പ്രളയ ദുരിതബാധിതര്‍ക്ക് ലഭിക്കേണ്ട ആശ്വാസ നടപടികളെല്ലാം സ്തംഭിച്ചിരിക്കുകയാണ്. ഇതിനു സര്‍ക്കാര്‍ വലിയ വില നല്‍കേണ്ടിവരുമെന്നും സുധീരന്‍ ഫേസ്ബുക്കില്‍ കുറിച്ചു.
ആദ്യം ശബരിമല യുവതീ പ്രവേശനം, പിന്നീട് നവോത്ഥാന മൂല്യങ്ങള്‍ വീണ്ടെടുക്കല്‍, തുടര്‍ന്ന് സ്ത്രീ ശാക്തീകരണം, ഇപ്പോള്‍ സ്ത്രീകള്‍ക്ക് നേരെയുള്ള അതിക്രമങ്ങള്‍ തടയല്‍ എന്നിങ്ങനെ വനിതാ മതിലിന്റെ ഉദ്ദേശത്തെക്കുറിച്ച് ലക്ഷ്യബോധമില്ലാതെയാണ് ഓരോ സമയത്തും പറയുന്നത്.
മതില്‍ നിര്‍മാണം കൊണ്ട് കേരളത്തിലെ ജനങ്ങളെ ഭിന്നിപ്പിക്കുകയും വിദ്വേഷം വളര്‍ത്തുകയും ചെയ്യാമെന്നല്ലാതെ മറ്റെന്ത് പ്രയോജനമാണ് ഉണ്ടാകുന്നതെന്ന് ഇനിയെങ്കിലും മുഖ്യമന്ത്രി വ്യക്തമാക്കണമെന്നും സുധീരന്‍ ആവശ്യപ്പെട്ടു.