ചെന്നൈ: അണ്ണാ ഡി.എം.കെ ഇരുവിഭാഗവും തമ്മിലുള്ള ലയനത്തെ പരിഹസിച്ച് പ്രശസ്ത സിനിമാ താരം കമല്‍ഹാസന്‍. ലയനത്തിലൂടെ നേതാക്കള്‍ ജനങ്ങളെ വിഡ്ഢികളാക്കുകയാണെന്നാണ് അദ്ദേഹം പരിഹസിച്ചത്.
ഗാന്ധിത്തൊപ്പി, കാവിത്തൊപ്പി, കശ്മിര്‍ തൊപ്പി തുടങ്ങിയ പലതരം തൊപ്പികള്‍ ഉണ്ട്. എന്നാല്‍ തമിഴ്‌നാട്ടിലെ ജനങ്ങളുടെ തലയില്‍ വിഡ്ഢികളുടെ തൊപ്പിയാണ് ഇരിക്കുന്നതെന്നും അദ്ദേഹം പറഞ്ഞു. ട്വിറ്ററിലാണ് അദ്ദേഹം ലയനത്തെ കണക്കറ്റ് പരിഹസിച്ചത്. തലയിലിരിക്കുന്ന വിഡ്ഢിത്തൊപ്പി എടുത്തുമാറ്റാന്‍ ജനങ്ങള്‍ തയാറാകണം.
പാര്‍ട്ടിയിലെ പിളര്‍പ്പും ലയനവുമെല്ലാം നേതാക്കളുടെ നാടകമാണെന്നും കമല്‍ഹാസന്‍ പറയുന്നു.
അടുത്തിടെ പളനിസാമി സര്‍ക്കാരിനെ രൂക്ഷമായി വിമര്‍ശിച്ചും കമല്‍ഹാസന്‍ രംഗത്തെത്തിയിരുന്നു.
സംസ്ഥാനത്ത് അഴിമതി കൊടികുത്തി വാഴുകയാണെന്നായിരുന്നു അദ്ദേഹം ആരോപിച്ചിരുന്നത്.