നാദാപുരം: സൈനിക ബാല പരീക്ഷണത്തില്‍ മികവ് തെളിയിച്ചു വിദ്യാര്‍ഥികള്‍ നാടിന്റെ അഭിമാനമായി. പേരോട് എം.ഐ.എം ഹയര്‍സെക്കന്‍ഡറി സ്‌കൂളിലെ എന്‍.സി.സി എയര്‍വിങ് വിഭാഗത്തിലെ കേഡറ്റുകളാണ് വിസ്മയകരമായ ആകാശപ്പറക്കല്‍ നടത്തിയത്.
സ്‌കൂളില്‍ നിന്ന് തെരഞ്ഞെടുക്കപ്പെട്ട ആറ് ആണ്‍കുട്ടികളും പെണ്‍കുട്ടികളുമാണ് എന്‍.സി.സിയുടെ പ്രത്യേക പരിശീലന പരിപാടിയായ ആകാശപ്പറക്കലില്‍ വിജയകരമായി പങ്കെടുത്തത്. കഴിഞ്ഞ ദിവസം കൊച്ചി വെല്ലിങ്ടണ്‍ ഐലന്റിലെ നേവി എയര്‍ ബേസിലായിരുന്നു പരിപാടി. സ്‌കൂളില്‍ നേരത്തെ നടത്തിയ സെലക്ഷനില്‍ വെച്ചാണ് സന ഫാത്തിമ, ഫാത്തിമ ഹുസ്‌ന, നന്ദന ചന്ദ്രന്‍, അഫീദ, ഹാമിദ ഫാത്തിമ, ഫാത്തിമ നിഹാല, മുഹമ്മദ്, ഫാദില്‍, മുഹമ്മദ് ജാസിം, സഫാന്‍, ജുമൈല്‍, സഫ്വാന്‍ എന്നിവരെ കൊച്ചിയിലേക്ക് തീരഞ്ഞെടുത്തത്.
വിങ് കമാണ്ടര്‍ വി. ഗണേഷ് നാരായണന്‍ ഇവര്‍ക്കുള്ള ക്ലാസും പരിശീലനത്തിന് നേതൃത്വവും നല്‍കി. ആദ്യമായാണ് ഒരു സ്‌കൂളില്‍ നിന്ന് ഇത്രയധികം വിദ്യാര്‍ഥികള്‍ പരിശീലനത്തില്‍ പങ്കെടുക്കുന്നത്. വിജയകരമായി പരിശീലനം പൂര്‍ത്തിയാക്കിയ വിദ്യാര്‍ഥികളെ നാട്ടുകാരും സ്‌കൂള്‍ മാനേജുമെന്റും ഇന്നലെ സ്‌കൂളില്‍ സംഘടിപ്പിച്ച യോഗത്തില്‍ അനുമോദിച്ചു.
മുഹമ്മദ് ബംഗ്ലത്ത്, പി.ബി കുഞ്ഞബ്ദുല്ല ഹാജി, മരുന്നൊളി കുഞ്ഞബ്ദുല്ല, മൊയ്തു പറമ്പത്ത്, സി. അബ്ദുല്‍ ഹമീദ്, കെ. അബ്ദുല്‍ ജലീല്‍ സംസാരിച്ചു. അഷ്‌റഫ് കിഴക്കയില്‍ അബ്ദുല്ല ഒലിയോട്ട് , സമീറ മാണിക്കോത്ത്, റൈഹാനത്ത് വിദ്യാര്‍ഥികള്‍ക്ക് ആവശ്യമായ സഹായങ്ങള്‍ നല്‍കി.