മാനന്തവാടി: ഉദ്യോഗസ്ഥരുടെ കെടുകാര്യസ്ഥത കാരണം സംസ്ഥാനത്തെ ഏക ആദിവാസി ട്രാന്‍സ്‌പോര്‍ട്ട് സഹകരണ സംഘത്തിന്റെ ആറ് ബസുകള്‍ സര്‍വിസ് നിര്‍ത്തി.
മാനന്തവാടി ആസ്ഥാനമായി പ്രവര്‍ത്തിക്കുന്ന പ്രിയദര്‍ശിനി ട്രാന്‍സ്‌പോര്‍ട്ട് സഹകരണ സംഘത്തിന്റെ ബസുകളാണ് കോടതിക്ക് സമീപം റോഡരികില്‍ നിരനിരയായി നിര്‍ത്തിയിട്ടിരിക്കുന്നത്. ദീര്‍ഘ ദൂര സര്‍വിസുകള്‍ നിര്‍ത്തിയിട്ട് ആറ് മാസമായി. ഇതിന് പിന്നാലെ വയനാട് ജില്ലയിലെ വിവിധ ഗ്രാമങ്ങളി ലേക്ക് സര്‍വിസ് നടത്തിയിരുന്ന മൂന്ന് ബസുകള്‍ ഒരാഴ്ച മുമ്പും സര്‍വിസ് നിര്‍ത്തി.
നസ്സാര കാര്യങ്ങളാണ് ഓട്ടം നിര്‍ത്താനുള്ള കാരണമായി അധികൃതര്‍ പറയുന്നത്. ജില്ലാ കലക്ടര്‍ ചെയര്‍മാനും സബ് കലക്ടര്‍ മാനേജിങ് ഡയറക്ടറുമായ ഭരണസമിതിയുടെ നിയന്ത്രണത്തില്‍ പ്രവര്‍ത്തിക്കുന്ന സംഘത്തില്‍ മുഴുവന്‍ അംഗങ്ങളും ആദിവാസികളാണ്. 36 തൊഴിലാളികള്‍ സംഘത്തില്‍ ജോലി ചെയ്യുന്നുണ്ട്. 1986ലാണ് സംസ്ഥാനത്ത് പട്ടിക വര്‍ഗ്ഗക്കാര്‍ക്കായി ട്രാന്‍സ്‌പോര്‍ട്ട് സഹകരണ സംഘങ്ങള്‍ തുടങ്ങിയത്.
വയനാട്ടിലെ ഒഴികെ മറ്റെല്ലാ സംഘങ്ങളും തകര്‍ന്നപ്പോഴും മാനന്തവാടിയിലെ സംഘം ലാഭകരമായിരുന്നു. ഓരോ തവണ യു.ഡി.എഫ് അധികാരത്തില്‍ വരുമ്പോഴും കൂടുത ല്‍ സര്‍ക്കാര്‍ ഫണ്ട് നല്‍കിയാണ് നിലനിര്‍ത്തിയിരുന്നത്. കഴിഞ്ഞ സര്‍ക്കാരിന്റെ കാലത്ത് മന്ത്രി പി.കെ ജയലക്ഷ്മി മുന്‍കൈ എടുത്ത് പട്ടികവര്‍ഗ്ഗ വികസന വകുപ്പ് മൂന്നര കോടി രൂപ അനുവദിച്ചിരുന്നു. ഈ ഫണ്ടുപയോഗിച്ചാണ് പുതിയ രണ്ട് ബസുകള്‍ വാങ്ങി തിരുവനന്തപുരത്തേക്ക് സര്‍വിസ് ആരംഭിച്ചത്. മറ്റൊരു ആഡംബര ബസ് ടൂറിസ്റ്റ് സര്‍വിസായും ഓടിയിരുന്നു.
ആകെയുള്ള എട്ട് ബസുകളില്‍ രണ്ടെണ്ണം മാത്രമാണ് ഇപ്പോള്‍ റൂട്ടിലോടുന്നത്. യാത്രാക്ലേശം രൂക്ഷമായ തിരുനെല്ലി, ബത്തേരി, വാളാട് റൂട്ടുകളില്‍ സര്‍വിസ് നിര്‍ത്തിയതോടെ ആ ഭാഗങ്ങളിലേക്ക് ജനങ്ങള്‍ യാത്രാക്ലേശം നേരിടുകയാണ്. നിര്‍ത്തിയിട്ട മൂന്ന് ബസുകള്‍ക്ക് ഇനി പുതിയ ഫിറ്റ്‌നസ് സര്‍ട്ടി ഫിക്കറ്റ് ലഭിക്കണം.
മറ്റുള്ളവക്ക് നിസ്സാര പ്രശ്‌നങ്ങള്‍ മാത്രമാണ് പരിഹരിക്കാനുള്ളത്. നിര്‍ത്തിയിട്ട ഓരോ ബസിനും മാസം പതിനൊന്നായിരം രൂപ വീതം നികുതി അടക്കാനുണ്ട്. സംഘ ത്തിന് പുതിയ സെക്രട്ടറിയെ നിയോഗിച്ചെങ്കിലും സാമ്പത്തിക പ്രയാസമുള്ളതിനാല്‍ ക്രിയാത്മകമായി പ്രവര്‍ത്തിക്കാന്‍ കഴിയില്ല.
ഇടത് സര്‍ക്കാര്‍ അധികാരത്തിലെത്തിയതിന് ശേഷം ഒരു രൂപ പോലും സംഘ ത്തിന് അനുവദിച്ചിട്ടില്ല. സ്ഥലം എം.എല്‍.എ വിഷയത്തില്‍ ഇടപെട്ടെങ്കിലും പരിഹാരമായില്ല.