കൊടുങ്ങല്ലൂര്‍: യൂത്ത് കോണ്‍ഗ്രസ്സിന്റെ താലൂക്ക് ഓഫീസ് മാര്‍ച്ചില്‍ സംഘര്‍ഷം. പ്രവര്‍ത്തകരെ പൊലിസ് അറസ്റ്റ് ചെയ്തു.
ആരോഗ്യ വകുപ്പ് മന്ത്രി ഷൈലജയുടെയും ട്രാന്‍സ്‌പോര്‍ട്ട് വകുപ്പ് മന്ത്രി തോമസ് ചാണ്ടിയുടെയും രാജി ആവശ്യപ്പെട്ട് യൂത്ത് കോണ്‍ഗ്രസ്സ് ചാലക്കുടി ലോകസഭാ കമ്മറ്റി നടത്തിയ പ്രതിഷേധ മാര്‍ച്ചിനിടയിലാണ് സംഘര്‍ഷമുണ്ടായത്. കെ.പി.സി.സി സെക്രട്ടറി ടി.യു രാധാകൃഷ്ണന്‍ മാര്‍ച്ച് ഉദ്ഘാടനം ചെയ്തയുടനെ പൊലിസും പ്രവര്‍ത്തകരും തമ്മില്‍ ഉന്തും തള്ളുമുണ്ടായി. നേതാക്കളും പൊലിസും സംയമനം പാലിച്ചതിനാല്‍ കൂടുതല്‍ പ്രശ്‌നങ്ങളുണ്ടായില്ല. റോഡില്‍ കുത്തിയിരുന്ന പ്രവര്‍ത്തകരെ പൊലിസ് ബലം പ്രയോഗിച്ച് അറസ്റ്റ് ചെയ്തു.
യൂത്ത് കോണ്‍ഗ്രസ്സ് ലോകസഭാ മണ്ഡലം പ്രസിഡന്റ് പി.ബി സുനീര്‍, കൈപ്പമംഗലം നിയോജക മണ്ഡലം പ്രസിഡന്റ് ടി.കെ നസീര്‍, പോള്‍ പാത്തിക്കല്‍, ആസിഫ്, പി.എ മനാഫ്, വാണി പ്രയാഗ്, സുദര്‍ശന്‍, കെ.കെ ഷാജഷാന്‍ തുടങ്ങിയവരെ പൊലിസ് അറസ്റ്റ് ചെയ്തു.
പിന്നീട് ഡി.സി.സി സെക്രട്ടറി അഡ്വ. പി.എച്ച് മഹേഷ്, എറിയാട് ബ്ലോക്ക് പ്രസിഡന്റ് പി.കെ ഷംസുദ്ദീന്‍, കൊടുങ്ങല്ലൂര്‍ മണ്ഡലം പ്രസിഡന്റ് ഡില്‍ഷന്‍ കൊട്ടേക്കാട്ട്, ഇ.എസ് സാബു, സി.എ റഷീദ് തുടങ്ങിയവര്‍ എത്തിയ ശേഷമാണ് കസ്റ്റഡിയിലെടുത്തവരെ ജാമ്യത്തില്‍ വിട്ടയച്ചത്.
അറസ്റ്റ് ചെയ്ത പ്രവര്‍ത്തകരെ പൊലിസ് മണിക്കൂറുകളോളം കസ്റ്റഡിയില്‍ വെച്ചതായി നേതാക്കള്‍ ആരോപിച്ചു.