തൃശൂര്‍: ഉത്തരേന്ത്യന്‍ സംസ്ഥാനങ്ങളിലേതിന് സമാനമായി കേരളത്തിലും വര്‍ഗ്ഗീയ ലഹളകള്‍ സൃഷ്ടിക്കാനും ആള്‍ക്കൂട്ട വിചാരണയിലൂടെ നിയമ സംവിധാനങ്ങളെ കയ്യിലെടുക്കാനുമുളള സംഘപരിവാര്‍ ശ്രമങ്ങള്‍ക്കെതിരെയും അത്തരം ക്രിമിനലുകള്‍ക്കെതിരെ സംസ്ഥാന സര്‍ക്കാര്‍ സ്വീകരിച്ച് വരുന്ന മൃദുസമീപനം അവസാനിപ്പിക്കണമെന്നാവിശ്യപ്പെട്ടുകൊണ്ടും എസ്.കെ.എസ്.എസ്.എഫ് സംസ്ഥാനങ്ങളിലുടനീളം ജില്ലാ കേന്ദ്രങ്ങളില്‍ നടത്താന്‍ ആഹ്വാനം ചെയ്ത മതസ്വാതന്ത്ര സംരക്ഷണ റാലി ജില്ലയില്‍ ഇന്ന് തൃശൂരില്‍ നടക്കും.
മതസ്പര്‍ദ്ധയും വര്‍ഗ്ഗീയ ലഹളയും ലക്ഷ്യമിട്ട് അടുത്ത കാലത്തായി സംഘ പരിവാര്‍ നടത്തിക്കൊണ്ടിരിക്കുന്ന ആസൂത്രിത നീക്കങ്ങളുടെ ഏറ്റവും ഒടുവിലത്തെ ഉദാഹരണമാണ് പറവൂര്‍ സംഭവം. സംഭവത്തില്‍ സര്‍ക്കാറിന്റെ ഏകപക്ഷീയവും അക്രമികളെ പ്രോത്സാഹിപ്പിക്കുന്ന തരത്തിലുമുളള സമീപനത്തിനെതിരെയുളള പ്രതിഷേധം വ്യാപകമാണ്.
കേരളം കാലങ്ങളായി കാത്ത് പോന്ന സൗഹാര്‍ദ്ദാന്തരീക്ഷത്തെ തകര്‍ക്കാനുളള ചില സാമൂഹ്യദ്രോഹികളുടെ ശ്രമത്തെ ജാനാധിപത്യ മാര്‍ഗ്ഗത്തില്‍ പ്രതിരോധിക്കുന്നതിന് ജില്ലയില്‍ നിന്നും എല്ലാ വിഭാഗം ജനങ്ങളും ഇന്ന് നടക്കുന്ന റാലിയില്‍ പങ്കെടുക്കും.
തൃശൂര്‍ എം.ഐ.സി മസ്ജിദില്‍ നിന്നും വൈകിട്ട് നാലിന് ആരംഭിക്കുന്ന റാലിയിലും തുടര്‍ന്ന് തൃശൂര്‍ കോര്‍പ്പറേഷന്‍ പരിസരത്ത് നടക്കുന്ന പ്രതിഷേധ സംഗമത്തിലും ജില്ലയിലെ മുഴുവന്‍ യൂണിറ്റുകളില്‍ നിന്നും എത്തിച്ചേരുന്ന സമസ്ത പ്രവര്‍ത്തകരും വിവിധ മതവിഭാഗ ജനങ്ങളും അണിനിരക്കും.
മുന്‍ എം.എല്‍.എയും തൃശൂര്‍ ഡി.സി.സി പ്രസിഡന്റുമായ ടി.എന്‍ പ്രതാപന്‍ മതസ്വാതന്ത്ര സംരക്ഷണ സംഗമം ഉദ്ഘാടനം ചെയ്യും. എസ്.വൈ .എസ് സംസ്ഥാന സെക്രട്ടറി നാസര്‍ ഫൈസി കൂടത്തായി മുഖ്യപ്രഭാഷണം നടത്തും. എസ്.കെ.എസ്.എസ്.എഫ് സംസ്ഥാന സെക്രട്ടറി ഡോ. സുബൈര്‍ ഹുദവി ചേകന്നൂര്‍ പ്രമേയ ഭാഷണം നടത്തും.
സമസ്ത ജില്ലാ പ്രസിഡന്റ് എസ്.എം.കെ തങ്ങള്‍, ജനറല്‍ സെക്രട്ടറി എം.എം മുഹിയുദ്ദീ്ന്‍ മൗലവി, എസ്.എം.എഫ് ജില്ലാ പ്രസിഡന്റ് ചെറുവാളൂര്‍ ഹൈദ്രോസ് മുസ്‌ലിയാര്‍, പി.ടി കുഞ്ഞിമുഹമ്മദ് മുസ്്‌ലിയാര്‍, ഇ.പി അബൂബക്കര്‍ ഖാസിമി, സുലൈമാന്‍ ദാരിമി ഏലംകുളം, മുഹമ്മദ് കുട്ടി ബാഖവി, അബ്ദുല്‍ കരീം ഫൈസി പൈങ്കണ്ണിയൂര്‍, ഹംസ ബിന്‍ ജമാല്‍ റംലി, ത്രീസ്റ്റാര്‍ കുഞ്ഞിമുഹമ്മദ് ഹാജി, സി.എ ലത്തീഫ് ദാരിമി ഹൈതമി, ഇല്യാസ് ഫൈസി, ഇല്യാസ് റഹ്മാനി, ടി.എസ് മമ്മി സാഹിബ്, സൈനുദ്ധീന്‍ ഫൈസി, ഉമര്‍ ബാഖവി പാടൂര്‍, സിദ്ധീഖ് ബദ്‌രി, ഷെഹീര്‍ ദേശമംഗലം, മഹ്‌റൂഫ് വാഫി, അഡ്വ. ഹാഫിള് അബൂബക്കര്‍ മാലികി, ഇബ്രാഹിം ഫൈസി പഴുന്നാന തുടങ്ങിയവര്‍ പങ്കെടുക്കും.