ന്യൂഡല്‍ഹി: 30 പേരുടെ മരണത്തിനിടയാക്കിയ കലാപത്തിനൊടുവില്‍, റാം റഹിമിനെതിരെ വിധി പ്രസ്താവിച്ച ജഡ്ജിക്ക് സംരക്ഷണം നല്‍കണമെന്ന് ഹരിയാന സര്‍ക്കാരിന് കേന്ദ്ര സര്‍ക്കാരിന്റെ നിര്‍ദേശം.

സി.ബി.ഐ പ്രത്യേക കോടതി ജഡ്ജി ജഗ്ദീപ് സിങിനാണ് സുരക്ഷയൊരുക്കാന്‍ ആവശ്യപ്പെട്ടിരിക്കുന്നത്. ഇന്റലിജന്‍സ് റിപ്പോര്‍ട്ട് പ്രകാരമാണ് ജഡ്ജിക്ക് സുരക്ഷ ശക്തമാക്കാന്‍ നിര്‍ദേശം നല്‍കിയത്. അതുപ്രകാരം സി.ആര്‍.പി.എഫിന്റെ സുരക്ഷയാണ് ഇപ്പോള്‍ ഒരുക്കുന്നത്.

അതേസമയം, സംഭവത്തെത്തുടര്‍ന്ന് കേന്ദ്ര ആഭ്യന്തര മന്ത്രി രാജ്‌നാഥ് സിങ് കിര്‍ഗിസ്ഥാനിലേക്കുള്ള യാത്ര മാറ്റിവച്ച് പ്രശ്‌നത്തില്‍ ഇടപെട്ടു. ഹരിയാന, പഞ്ചാബ് മുഖ്യമന്ത്രിമാരെ വിളിച്ച് കാര്യങ്ങള്‍ അന്വേഷിച്ചിട്ടുണ്ടെന്ന് അദ്ദേഹം പറഞ്ഞു. കൂടാതെ, ഡല്‍ഹി, രാജസ്ഥാന്‍, ഛണ്ഡീഗഢ് എന്നിവിടങ്ങളിലും ജാഗ്രാതാ നിര്‍ദേശം നല്‍കിയിട്ടുണ്ടെന്നും അദ്ദേഹം പറഞ്ഞു.