പയ്യന്നൂര്‍: തളിപ്പറമ്പ് തൃച്ചംബരത്തെ റിട്ട. സഹകരണ രജിസ്ട്രാര്‍ പുതുക്കുളങ്ങര ബാലകൃഷ്ണന്റെ സ്വത്ത് വ്യാജരേഖയുണ്ടാക്കി തട്ടിയെടുത്ത സംഭവത്തില്‍ പ്രതികളെ തിരുവനന്തപുരത്തെത്തിച്ചു തെളിവെടുത്തു. ഒന്നാംപ്രതിയും പയ്യന്നൂര്‍ബാറിലെ അഭിഭാഷകയുമായ കെ.വി ശൈലജയെയും രണ്ടാം പ്രതിയും ശൈലജയുടെ ഭര്‍ത്താവുമായ പി.കൃഷ്ണകുമാറിനെയുമാണ് പയ്യന്നൂര്‍ സി.ഐ എം.പി ആസാദിന്റെ നേതൃത്വത്തിലുള്ള അന്വേഷണ സംഘം തിരുവനന്തപുരത്തെത്തിച്ച് തെളിവുകള്‍ ശേഖരിച്ചത്. കഴിഞ്ഞ രണ്ട് ദിവസങ്ങളിലായി നടത്തിയ തെളിവെടുപ്പില്‍ അന്വേഷണ സംഘത്തിന് നിര്‍ണായകമായ വിവരങ്ങളാണ് ലഭിച്ചത്.
ബാലകൃഷ്ണന്‍ ജോലിയില്‍ നിന്ന് വിരമിച്ചതിന്റെ രേഖകള്‍ സഹകരണ വകുപ്പില്‍നിന്ന് പൊലിസ് ശേഖരിച്ചു. ഈ രേഖകളിലൊന്നും തന്നെ പിന്തുടര്‍ച്ചാവകാശിയായി ആരെയും ഉള്‍പ്പെടുത്തിയിട്ടില്ല. പെന്‍ഷന്‍ തുക കൈക്കലാക്കുന്നതിനായി, പയ്യന്നൂരിലെ പ്രമുഖ രാഷ്ട്രീയനേതാവിന്റെ സഹായത്തോടെ ശൈലജയുടെ സഹോദരി ജാനകിയെ ബാലകൃഷ്ണന്റെ പിന്തുടര്‍ച്ചാവകാശിയാക്കുന്നതിനായി ചമച്ച വ്യാജ രേഖകളുടെ പകര്‍പ്പുകളും അന്വേഷണ സംഘം കണ്ടെത്തി.
കൂടാതെ ബാലകൃഷ്ണന്‍ ജോലിയില്‍ വിരമിച്ച ശേഷം ലഭിച്ച പണം കാനറാ ബാങ്കിന്റെ ശാഖയില്‍ നിക്ഷേപിച്ചിരുന്നു. ഈ പണവും ശൈലജയും ഭര്‍ത്താവും പിന്‍വലിച്ചിരുന്നു. ഇതിന്റെരേഖകളും ബാങ്കില്‍ നിന്ന് ശേഖരിച്ചിട്ടുണ്ട്. തിരുവനന്തപുരം ജനറല്‍ ആശുപത്രിയില്‍ അതീവ ഗുരുതരാവസ്ഥയില്‍ ചികിത്സയില്‍ കഴിഞ്ഞിരുന്ന ബാലകൃഷ്ണനെ നിര്‍ബന്ധിച്ച് ഡിസ്ചാര്‍ജ് ചെയ്യിപ്പിച്ച് നാട്ടിലേക്ക് പുറപ്പെട്ട ആംബുലന്‍സിന്റെ ഡ്രൈവര്‍മാരെ അന്വേഷണസംഘം കണ്ടെത്തി. മീററ്റില്‍ സൈന്യത്തില്‍ ജോലി ചെയ്യുന്ന നേമം സ്വദേശി അരുണ്‍, തിരുവന്തപുരത്തുള്ള രാജേഷ് എന്നിവരുടെ മൊഴികളാണെടുത്തത്. തിരുവനന്തപുരത്ത് നിന്ന് ബാലകൃഷ്ണനുമായി പുറപ്പെട്ട ആംബുലന്‍സില്‍ ശൈലജയും ഭര്‍ത്താവുമുണ്ടായിരുന്നതായി ഇവര്‍ അന്വേഷണ സംഘത്തോട് വെളിപ്പെടുത്തി.
ബാലകൃഷ്ണന്റെ മരണശേഷം തിരുവനന്തപുരം പേട്ടയിലുള്ള ഇദ്ദേഹത്തിന്റെ വീടിന്റെയും സ്ഥലത്തിന്റെയും വ്യാജരേഖകളുണ്ടാക്കി നിഷാ റാണിക്ക് വില്‍പ്പന നടത്തിയിരുന്നു. ഇതിനെതിരേ നിഷാറാണി പൊലിസില്‍ അഭിഭാഷകയ്ക്കും ഭര്‍ത്താവിനുമെതിരേ വഞ്ചനാക്കുറ്റത്തിന് പരാതി നല്‍കിയതായും സംഘം കണ്ടെത്തി.