തിരുവനന്തപുരം: ശിവഗിരി മഠത്തില്‍ മഹാസമാധി മന്ദിരത്തിലെ ഗുരുദേവ പ്രതിഷ്ഠയുടെ കനകജൂബിലി ആഘോഷവും ആഗോള ശ്രീനാരായണ പ്രസ്ഥാനങ്ങളുടെ സംഗമവും ഒക്ടോബര്‍ 1,2,3 തിയതികളില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. കനകജൂബിലി ആഘോഷങ്ങളുടെ ഭാഗമായി അന്തര്‍ദേശീയ, ദേശീയ, സംസ്ഥാന, ജില്ലാതല പ്രാര്‍ത്ഥനായോഗങ്ങള്‍ സെമിനാറുകള്‍, പ്രഭാഷണങ്ങള്‍, പഠനക്ലാസുകള്‍ എന്നിവ പലയിടങ്ങളിലായി നടന്നുവരികയാണ്. 

മഹാസമാധിയില്‍ നിന്നും തെളിയിക്കുന്ന ശ്രീനാരായണ ദിവ്യജ്യോതി കേരളം മൊത്തം പര്യടനം നടത്തും. ഗുരുദേവ സന്ദേശ പ്രചാരണം കാര്യക്ഷമമാക്കി വ്യാപിപ്പിക്കുന്നതിന് 1, 2, 3 തിയതികളില്‍ ആഗോള ശ്രീനാരായണ പ്രസ്ഥാന സംഗമം സംഘടിപ്പിക്കും. കനകജൂബിലി ആഘോഷകമ്മിറ്റി സെക്രട്ടറി സച്ചിദാനന്ദ സ്വാമി, ഗുരുജയന്തി ആഘോഷകമ്മിറ്റി സെക്രട്ടറി വിശാലാനന്ദ സ്വാമി, കനകജൂബിലി ആഘോഷ മീഡിയാ കമ്മിറ്റി കണ്‍വീനര്‍ വണ്ടന്നൂര്‍ സന്തോഷ് എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.